ກອງປະຊຸມ ຝຶກອົບຮົມ ດ້ານການສ່ອງກ້ອງລະບົບລະລາຍ ແລະ ວິທີການຮັກສາເຄື່ອງມື

Posted on September 3, 2026September 3, 2026 by Mahosot_H Admin

ໃນວັນທີ 27 ສິງຫາ 2026, ໄດ້ຈັດກອງປະຊຸມຝຶກອົບຮົມດ້ານການສ່ອງກ້ອງລະບົບລະລາຍ ແລະ ວິທີການຮັກສາເຄື່ອງມື ທັງເປັນກິດຈະກຳໜຶ່ງຂອງ ກອງປະຊຸມວິຊາການ ປະຈຳປີ 2026 ສະມາຄົມແພດກະເພາະລຳໃສ້ ແລະ ຕັບລາວ ຄັ້ງທີ 04, ກິດຈະກຳດັ່ງກ່າວແມ່ນການຮ່ວມມືລະຫວ່າງ ໂຮງໝໍມະໂຫສົດ ແລະ ໂຮງໝໍ ຣາຊວິຖີ ປະເທດໄທ ຊຶ່ງຄັ້ງນີ້ເປັນຄັ້ງທີ 2, ໃຫ້ກຽດເປັນປະທານຂອງ ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ ແລະ

ທ່ານ ຮສ.ດຣ. ບົວຈັນ ຣາຊຈັກ ປະທານສະມາຄົມ ແພດກະເພາະລຳໃສ້ ແລະ ຕັບລາວ ແລະ ທ່ານ ດຣ. ທະວີ ຣັດຕານາຊຸເອກ ຫົວໜ້າສູນສ່ອງກ້ອງ ໂຮງໝໍ ຣາຊວິຖີ ປະເທດໄທ. ມີບັນດາທ່ານໝໍ - ພະຍາບານ ທີ່ຮັບຜິດຊອບວຽກງານດັ່ງກ່າວຂອງ ໂຮງໝໍສູນກາງ 05 ແຫ່ງ,ໂຮງໝໍແຂວງ 10 ແຂວງ ແລະ ພາກສ່ວນທີ່ກ່ຽວຂ້ອງ ຈໍານວນ 70 ທ່ານ.

ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ ໄດ້ກ່າວມີຄຳເຫັນ ແລະ ເປີດກອງປະຊຸມຊຸດຝຶກອົບຮົມ ຊຶ່ງໃນບາງຕອນທ່ານໄດ້ກ່າວວ່າ:

ວຽກງານດັ່ງກ່າວແມ່ນມີຄວາມສຳຄັນຫຼາຍຕໍ່ການບົ່ງມະຕິ ແລະ ປິ່ນປົວພະຍາດທາງລະບົບລະລາຍ ໂດຍສະເພາະແມ່ນການຝຶກທັກສະໃນການສ່ອງກ້ອງ ດັ່ງຄຳຂວັນທີ່ວ່າ:

“ກ້າວເຂົ້າສູ່ຄວາມສໍາເລັດໃນການສ່ອງກ້ອງ - ຄວາມຊ່ຽວຊານໃນຫັດຖະການ ແລະ ການຮັກສາເຄື່ອງມື”

ກອງປະຊຸມໃນຄັ້ງນີ້ຈັດຂຶ້ນເພື່ອຍົກລະດັບຄວາມຮູ້ຄວາມສາມາດ, ທັກສະຂອງທີມງານທ່ານໝໍ-ພະຍາບານພາຍໃນປະເທດ ໃຫ້ທັນກັບຄວາມກ້າວໜ້າທາງດ້ານເຕັກໂນໂລຊີການແພດ ແລະ ເປີດໂອກາດໃຫ້ຜູ້ເຂົ້າຮ່ວມໄດ້ສົນທະນາ, ແລກ ປ່ຽນປະສົບການຕົວຈິງ ກັບຊ່ຽວຊານພາຍໃນ ແລະ ຕ່າງປະເທດ. ເພື່ອສ້າງຄວາມຊໍານານດ້ານຫັດຖະການເຕັກນິກການສ່ອງກ້ອງ ແລະ ປິ່ນປົວພະຍາດກະເພາະລຳໃສ້ ແລະ ຕັບ ໃຫ້ມີຄວາມຊັດເຈນ, ວ່ອງໄວ ແລະ ປອດໄພສູງສຸດຕໍ່ຄົນເຈັບ ແລະ ການບຳລຸງຮັກສາເຄື່ອງມືອຸປະກອນການແພດໃຫ້ໄດ້ມາດຕະຖານ, ການເກັບຮັກສາອຸປະກອນສ່ອງກ້ອງຢ່າງຖືກວິທີ ເພື່ອເພີ່ມອາຍຸການໃຊ້ງານ ແລະ ປ້ອງກັນການຕິດເຊື້ອ ເຊິ່ງຖືເປັນອີກກ້າວໜຶ່ງທີ່ສຳຄັນໃນການຍົກລະດັບຂົງເຂດສາທາລະນະສຸກຂອງລາວໃຫ້ມີຄວາມກ້າວໜ້າຢ່າງຕໍ່ເນື່ອງ ແລະ ຢືນຢົງ.

ພິທີປະກາດພະນັກງານນໍາພາ-ຄຸ້ມຄອງ ທີ່ດໍາລົງຕໍາແໜ່ງປະເພດ 3 ພັກການ-ຮັບອຸດໜູນບໍານານ, ໂຮງໝໍມະໂຫສົດ

Posted on September 3, 2026September 3, 2026 by Mahosot_H Admin

ວັນທີ 25 ສິງຫາ 2026, ໂຮງໝໍມະໂຫສົດ ໄດ້ຈັດພິທີປະກາດພະນັກງານນໍາພາ-ຄຸ້ມຄອງ ທີ່ດໍາລົງຕໍາແໜ່ງປະເພດ 3 ພັກການ-ຮັບອຸດໜູນບໍານານ, ໂຮງໝໍມະໂຫສົດ ໂດຍໄດ້ຮັບກຽດການເປັນປະທານຂອງ ທ່ານ ປອ.ດຣ. ບຸນເສີດ ແກ້ວປະສິດ ຮອງລັດຖະມົນຕີກະຊວງສາທາລະນະສຸກ. ເຊິ່ງມີພາກສ່ວນຕ່າງໆເຂົ້າຮ່ວມເຊັ່ນ: ຫົວໜ້າກົມຈັດຕັ້ງ-ພະນັກງານ, ຜູ້ອໍານວຍການໂຮງໝໍມະໂຫສົດ ພ້ອມດ້ວຍຄະນະ, ຄະນະພັກ, ຄະນະພະແນກ, ຄະນະຂະແໜງ ແລະ ພະນັກງານແພດໝໍວິຊາການກໍ່ໄດ້ເຂົ້າຮ່ວມ. ໃນພິທີ, ໄດ້ມີການປະກາດ ພະນັກງານນໍາພາ-ຄຸ້ມຄອງ ທີ່ດໍາລົງຕໍາແໜ່ງປະເພດ 3 ພັກການ-ຮັບອຸດໜູນບໍານານ ຈໍານວນ 02 ທ່ານ:
1. ທ່ານ ດຣ. ບຸນໂຮມ ກັນທະວົງ ຮອງຜູ້ອໍານວຍການໂຮງໝໍມະໂຫສົດ
2. ທ່ານ ນ. ບົວວັນ ປະທຸມທອງ ຮອງຜູ້ອໍານວຍການໂຮງໝໍມະໂຫສົດ

ໃນໂອກາດດັ່ງກ່າວ ທ່ານ ປອ.ດຣ. ບຸນເສີດ ແກ້ວປະສິດ ຮອງລັດຖະມົນຕີກະຊວງສາທາລະນະສຸກ ໄດ້ກ່າວມີຄໍາເຫັນ ແລະ ສະແດງຄວາມຍ້ອງຍໍຊົມເຊີຍຢ່າງສຸດໃຈ ຕໍ່ຜົນງານໄລຍະຜ່ານມາ ໃນການເສຍສະຫຼະ, ການອຸທິດເຫື່ອແຮງ, ຄວາມຮູ້ຄວາມສາມາດ ແລະ ສະຕິປັນຍາປະກອບສ່ວນວຽກງານຢ່າງຫຼວງຫຼາຍ ຂອງທັງສອງທ່ານເຊິ່ງຜົນງານ ແລະ ຄວາມດີງາມເຫຼົ່ານັ້ນ ໄດ້ກາຍເປັນແບບຢ່າງອັນດີງາມໃຫ້ແກ່ພະນັກງານ-ແພດໝໍ ລຸ້ນຫຼັງຂອງໂຮງໝໍມະໂຫສົດ ໄດ້ຮຽນຮູ້ ແລະ ສືບທອດຕໍ່ໄປ.

ສະຫາຍ ປອ.ດຣ ບຸນເສີດ ແກ້ວປະສິດ ຄະນະພັກປະຈໍາ, ຮອງລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ ໃນໂອກາດລົງຊີ້ນໍາ, ຕິດຕາມ ແລະ ຊຸກຍູ້ກອງປະຊຸມດໍາເນີນຊີວິດພັກ ຂອງໂຮງໝໍມະໂຫສົດ.

Posted on September 3, 2026September 3, 2026 by Mahosot_H Admin

ວັນທີ 06 ສິງຫາ 2026, ສະຫາຍ ປອ. ດຣ. ບຸນເສີດ ແກ້ວປະສິດ, ຄະນະປະຈໍາພັກ, ຮອງລັດຖະມົນຕີ ກະຊວງສາທາລະນະສຸກ ພ້ອມດ້ວຍຄະນະ ໃນໂອກາດຊີ້ນໍາ, ຕິດຕາມ ແລະ ຊຸກຍູ້ກອງປະຊຸມດໍາເນີນຊີວິດພັກ ຂອງຄະນະພັກໂຮງໝໍມະໂຫສົດ. ເຊິ່ງມີພາກສ່ວນຕ່າງໆເຂົ້າຮ່ວມເຊັ່ນ: ສະຫາຍ ປອ.ດຣ. ຊູຊາດ ວົງພະຈັນ ກໍາມະການພັກກະຊວງ, ເລຂາຄະນະພັກຮາກຖານ, ຄະນະປະຈໍາພັກ, ຜູ້ອໍານວຍການໂຮງໝໍມະໂຫສົດ ພ້ອມດ້ວຍຄະນະ, ກົມຈັດຕັ້ງພະນັກງານ, ກົມກວດກາ, ຄະນະພັກ, ຄະນະໜ່ວຍພັກ ພ້ອມດ້ວຍບັນດາສະມາຊິກພັກສົມບູນ ແລະ ສໍາຮອງໂຮງໝໍມະໂຫສົດກໍ່ເຂົ້າຮ່ວມຢ່າງພ້ອມພຽງ.

ສະຫາຍ ປອ.ດຣ. ຊູຊາດ ວົງພະຈັນ ກໍມະການພັກກະຊວງ, ເລຂາຄະນະພັກຮາກຖານ, ຄະນະປະຈໍາພັກ, ຜູ້ອໍານວຍການໂຮງໝໍມະໂຫສົດ ໄດ້ກ່າວຕ້ອນຮັບ ແລະ ນໍາສະເໜີບົດລາຍງານການນໍາພາ, ຊີ້ນໍາ ຂອງຄະນະພັກຮາກຖານ, ໂຮງໝໍມະໂຫສົດ ໃນໄລຍະຜ່ານມາ. ກອງປະຊຸມດໍາເນີນຊີວິດພັກໃນຄັ້ງນີ້ ມີຈຸດປະສົງເພື່ອສໍາຫຼວດກວດກາ ແລະ ຕີລາຄາການຊີ້ນໍາ-ນໍາພາຂອງຄະນະພັກ ໃນໄລຍະຜ່ານມາ, ພ້ອມທັງຕີລາຄາຄຸນສົມບັດທັດສະນະການເມືອງ, ຄວາມຮັບຜິດຊອບ ແລະ ຜົນງານການເຄື່ອນໄຫວວຽກງານຂອງສະມາຊິກພັກແຕ່ລະສະຫາຍ. ພ້ອມດຽວກັນນັ້ນ, ກໍ່ໄດ້ຮ່ວມກັນປະກອບຄໍາຄິດຄໍາເຫັນ, ຕໍານິສົ່ງຂ່າວເພື່ອສ້າງຄວາມເຂັ້ມແຂງ, ຄວາມສາມັກຄີພາຍໃນ ແລະ ປັບປຸງຂໍ້ບົກພ່ອງ ໃຫ້ມີຄວາມສົມບູນແບບຍິ່ງຂຶ້ນ.

ໃນໂອກາດນີ້, ສະຫາຍ ປອ. ດຣ. ບຸນເສີດ ແກ້ວປະສິດ ຄະນະປະຈໍາພັກ, ຮອງລັດຖະມົນຕີ ກະຊວງສາທາລະນະສຸກ ໄດ້ໃຫ້ກຽດໂອ້ລົມ ແລະ ທິດຊີ້ນໍາຕໍ່ກອງປະຊຸມ. ທ່ານໄດ້ເນັ້ນໜັກໃຫ້ຄະນະພັກ ແລະ ສະມາຊິກພັກທຸກສະຫາຍ ເອົາໃຈໃສ່ຍົກສູງ ຄວາມຮັບຮອງໃນດ້ານການເມືອງ, ທັດສະນະ, ເພີ່ມພູນຄວາມຮູ້ຄວາມສາມາດໃນດ້ານວິຊາການ, ແລະ ເປັນແບບຢ່າງທີ່ດີໃນການບໍລິການປະຊາຊົນ. ພ້ອມທັງໃຫ້ສຸມໃສ່ປັບປຸງຄຸນນະພາບການບໍລິການທາງດ້ານການແພດ, ເອົາໃຈໃສ່ຈັນຍາບັນຈັນຍາທໍາຂອງແພດ-ໝໍ ແລະ ສືບຕໍ່ພັດທະນາໂຮງໝໍມະໂຫສົດ ໃຫ້ເປັນໂຮງໝໍແບບຢ່າງ ທີ່ທັນສະໄໝ ແລະ ໄດ້ມາດຕະຖານ, ເພື່ອຮັບປະກັນການປິນປົວ ແລະ ເບິ່ງແຍງສຸຂະພາບຂອງປະຊາຊົນໃຫ້ມີປະສິດທິພາບ.

ພິທີເຜີຍແຜ່, ເຊື່ອມຊືມ ແລະ ປະຖະກະຖາ ເອກະສານສໍາຄັນ ຂອງພັກ ຂອງຊາດ

Posted on August 3, 2026August 3, 2026 by Mahosot_H Admin

ວັນທີ 24 ກໍລະກົດ 2026, ໂຮງໝໍມະໂຫສົດ, ໄດ້ຈັັດພິທີເຜີຍແຜ່, ເຊື່ອມຊືມ ແລະ ປະຖະກະຖາ ເອກະສານສໍາຄັນ ຂອງພັກ ຂອງຊາດ. ໃຫ້ກຽດການເປັນປະທານ ແລະ ເຜີຍແຜ່ໂດຍ ສະຫາຍ ປອ.ດຣ. ຊູຊາດ ວົງພະຈັນ ກໍາມະການພັກກະຊວງສາທາລະນະສຸກ, ເລຂາຄະນະພັກ, ຄະນະປະຈໍາພັກ, ຜູ້ອໍານວຍການໂຮງໝໍມະໂຫສົດ ແລະ ສະຫາຍ ດຣ. ໄຊຊະນະ ສົມບັນດິດ ຮອງເລຂາຄະນະພັກຮາກຖານ, ຄະນະປະຈໍາພັກ, ຮອງຜູ້ອໍານວຍການໂຮງໝໍມະໂຫສົດ. ເຊິ່ງມີພາກສ່ວນຕ່າງໆເຂົ້າຮ່ວມເຊັ່ນ: ຄະນະພັກ, ຄະນະອໍານວຍການ, ຄະນະໜ່ວຍພັກ, ສາມອົງການຈັດຕັ້ງມະຫາຊົນ, ຄະນະພະແນກ, ຄະນະຂະແໜງ ແລະ ຕະຫຼອດຮອດພະນັກງານວິຊາການ ພາຍໃນໂຮງໝໍເຂົ້າຮ່ວມຢ່າງພ້ອມພຽງ.

ສະຫາຍ ປອ.ດຣ. ຊູຊາດ ວົງພະຈັນ ກໍາມະການພັກກະຊວງສາທາລະນະສຸກ, ເລຂາຄະນະພັກ, ຄະນະປະຈໍາພັກ, ຜູ້ອໍານວຍການໂຮງໝໍມະໂຫສົດ ໄດ້ກ່າວເປີດພິທີ ພ້ອມທັງເຜີຍແຜ່ ເອກະສານກົດລະບຽບພັກປະຊາຊົນ ປະຕິວັດລາວ ສະໄໝທີ XII ແລະ ຄໍາແນະນໍາຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດກົດລະບຽບພັກປະຊາຊົນ ປະຕິວັດລາວ ສະໄໝທີ XII, ສະບັບເລກທີ 303/ຄຈສພ, ລົງວັນທີ 20 ພຶດສະພາ 2026, ເອກະສານວັນສົນທິສັນຍາມິດຕະພາບ-ການຮ່ວມມືລາວ-ຫວຽດນາມ, ວັນທີ 18 ກໍລະກົດ 1977 – 18 ກໍລະກົດ 2026 ຄົບຮອບ 49 ປີ ແລະ ເອກະສານການສ້າງຕັ້ງສາຍພົວພັນການທູດລາວ-ຫວຽດນາມ, ວັນທີ 05 ກັນຍາ 1962 – 05 ກັນຍາ 2026, ຄົບຮອບ 64 ປີ ແລະ ສະຫາຍ ດຣ. ໄຊຊະນະ ສົມບັນດິດ ຮອງເລຂາຄະນະພັກຮາກຖານ, ຄະນະປະຈໍາພັກ, ຮອງຜູ້ອໍານວຍການໂຮງໝໍມະໂຫສົດ ໄດ້ເຜີຍແຜ່ເອກະສານ ວັນເກີດ ປະທານ ສຸພານຸວົງ ວັນທີ 13 ກໍລະກົດ 1909, ຄົບຮອບ 117 ປີ ແລະ ເອກະສານ ການຈັດຕັ້ງປະຕິບັດກົດໝາຍ ວ່າດ້ວຍ ພະນັກງານ-ລັດຖະກອນ ສະບັບເລກທີ 347/ຄຈສ, ລົງວັນທີ 19 ມິຖຸນາ 2026.

ພິທີໃນຄັ້ງນີ້ ຈັດຂຶ້ນເພື່ອຍົກສູງລະດັບຄວາມຮູ້, ຄວາມເຂົ້າໃຈ ແລະ ດ້ານແນວຄິດການເມືອງຂອງຄະນະພັກ, ສະມາຊິກພັກ ແລະ ພະນັກງານ-ວິຊາການ ພາຍໃນໂຮງໝໍມະໂຫສົດ ໃຫ້ມີຄວາມເຊື່ອມຊຶມຢ່າງເລິກເຊິ່ງ ເພື່ອນໍາໄປຈັດຕັ້ງປະຕິບັດເຂົ້າໃນວຽກງານຕົວຈິງ ໃຫ້ມີຜົນສັກສິດ, ມີລະບຽບວິໄນ ແລະ ເປັນເອກະພາບກັນໃນທົ່ວອົງການຈັດຕັ້ງ.

ກິດຈະກໍາງານຕະຫຼາດນັດ ຢູ່ໂຮງໝໍມະໂຫສົດ ເພື່ອສະເຫຼີມສະຫຼອງ ວັນສ້າງຕັ້ງສະຫະພັນແມ່ຍິງລາວ ຄົບຮອບ 71 ປີ (20 ກໍລະກົດ 1955 – 20 ກໍລະກົດ 2026).

Posted on July 21, 2026July 22, 2026 by Mahosot_H Admin

ວັນທີ 16 ກໍລະກົດ 2026, ໂຮງໝໍມະໂຫສົດ ໄດ້ຈັດກິດຈະກໍາງານຕະຫຼາດນັດ ເພື່ອເປັນການສ້າງຂະບວນການຕ້ອນຮັບ ແລະ ຊົມເຊີຍ ວັນສ້າງຕັ້ງສະຫະພັນແມ່ຍິງລາວ ຄົບຮອບ 71 ປີ (20 ກໍລະກົດ 1955 – 20 ກໍລະກົດ 2026) ໃຫ້ມີຄວາມໝາຍຄວາມສຳຄັນ ແລະ ເຕັມໄປດ້ວຍບັນຍາກາດອັນເບີກບານມ່ວນຊື່ນ, ໃຫ້ກຽດການເປັນປະທານເປີດພິທີໂດຍ ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ເຊິ່ງມີພາກສ່ວນຕ່າງໆເຂົ້າຮ່ວມຢ່າງຫຼວງຫຼາຍເຊັ່ນ: ຄະນະພັກ, ຄະນະອຳນວຍການ, ສາມອົງການຈັດຕັ້ງມະຫາຊົນ, ຄະນະພະແນກ, ແພດໝໍ, ພະຍາບານ, ພະນັກງານ, ປະຊາຊົນທີ່ມາໃຊ້ບໍລິການຢູ່ໂຮງໝໍ ແລະ ພາກສ່ວນທີ່ກ່ຽວຂ້ອງກໍ່ເຂົ້າຮ່ວມ.

ບັນຍາກາດພາຍໃນງານຕະຫຼາດນັດຄັ້ງນີ້ ເປັນໄປຢ່າງຄຶກຄື້ນ ແລະ ອົບອຸ່ນ ທ່າມກາງຮອຍຍິ້ມ ແລະ ສຽງຫົວຂອງຜູ້ເຂົ້າຮ່ວມ. ພາຍໃນງານໄດ້ຈັດຮ້ານວາງສະແດງ ແລະ ຈຳໜ່າຍອາຫານພື້ນເມືອງ, ເຄື່ອງດື່ມເພື່ອສຸຂະພາບ, ໝາກໄມ້ສົດ, ຜະລິດຕະພັນຫັດຖະກຳ ແລະ ສິນຄ້າຈາກພະແນກຕ່າງໆ ຂອງໂຮງໝໍມະໂຫສົດ. ພ້ອມກັນນັ້ນ ຍັງມີການແນະນຳຢາ ແລະ ເຜີຍແຜ່ຄວາມຮູ້ດ້ານສຸຂະພາບໃຫ້ປະຊາຊົນ. ກິດຈະກຳນີ້ ບໍ່ພຽງແຕ່ສະຫຼອງຄົບຮອບ 71 ປີ ວັນສ້າງຕັ້ງສະຫະພັນແມ່ຍິງລາວ ແຕ່ຍັງເປັນເວທີສົ່ງເສີມຄວາມສາມັກຄີ, ສ້າງຂວັນກຳລັງໃຈ ແລະ ສືບຕໍ່ຂະບວນການ "3 ດີ" ຂອງແມ່ຍິງລາວ ພົນລະເມືອງດີ, ແມ່ພິມດີ ແລະ ພັນລະຍາດີ ເພື່ອຮ່ວມພັດທະນາວຽກງານສາທາລະນະສຸກໃຫ້ກ້າວໜ້າຢ່າງຍືນຍົງ.

ພິທີສະເຫຼີມສະຫຼອງ ວັນສາທາລະນະສຸກລາວ ຄົບຮອບ 61 ປີ, (18 ມິຖຸນາ 1965 – 18 ມິຖຸນາ 2026) ຂອງໂຮງໝໍມະໂຫສົດ

Posted on June 25, 2026June 25, 2026 by Mahosot_H Admin

ໃນວັນທີ19 ມິຖຸນາ 2026, ໂຮງໝໍມະໂຫສົດ ໄດ້ຈັດພິທີສະເຫຼີມສະຫຼອງ ວັນສາທາລະນະສຸກລາວ (ວັນແພດລາວ) ຄົບຮອບ 61 ປີ (18 ມິຖຸນາ 1965 - 18 ມິຖຸນາ 2026) ຂຶ້ນຢ່າງເປັນທາງການ. ໂດຍໃຫ້ກຽດເຂົ້າຮ່ວມຂອງ ທ່ານ ປອ.ດຣ. ຊູຊາດ ວົງພະຈັນຜູ້ອຳນວຍການໂຮງໝໍມະໂຫສົດ, ພ້ອມດ້ວຍຄະນະອຳນວຍການ, ອະດີດການນຳ, ພະນັກງານອາວຸໂສບໍານານ, ຕະຫຼອດຮອດແພດໝໍ, ພະຍາບານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໃນພິທີ, ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ໄດ້ກ່າວເປີດພິທີ ພ້ອມທັງຜ່ານບົດລາຍງານສະພາບການນຳພາ-ຊີ້ນຳ ຂອງຄະນະບໍລິຫານງານໂຮງໝໍມະໂຫສົດ ລຸ້ນທີ 25. ຈາກນັ້ນ, ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ ກໍໄດ້ຂຶ້ນນຳສະເໜີສະພາບລວມ ຂອງການຈັດຕັ້ງປະຕິບັດກິດຈະກຳຕ່າງໆ ເພື່ອສະເຫຼີມສະຫຼອງວັນສຳຄັນດັ່ງກ່າວ. ພາຍໃນງານຍັງມີການສະແດງສິລະປະ-ວັນນະຄະດີ ເປັນຕົ້ນແມ່ນ ບົດຟ້ອນ ແລະ ຮ້ອງເພງທີ່ມີບັນຍາກາດຟົດຟື້ນ, ພ້ອມທັງມີການນຳສະເໜີບົດຄົ້ນຄວ້າວິທະຍາສາດທີ່ມີຄຸນຄ່າທາງການແພດ. ໂອກາດນີ້, ຄະນະປະທານກໍໄດ້ໃຫ້ກຽດມອບຂອງຂວັນໃຫ້ແກ່ ອະດີດການນຳພັກ-ລັດ, ພະນັກງານແພດໝໍອາວຸໂສບຳນານ ແລະ ມອບລາງວັນໃຫ້ແກ່ນັກສຳມະນາກອນ ທີ່ຂຶ້ນນຳສະເໜີບົດຄົ້ນຄວ້າວິທະຍາສາດ, ທີມງານສິລະປະ, ຕະຫຼອດຮອດພະນັກງານດີເດັ່ນ ຂອງໂຮງໝໍມະໂຫສົດ ເພື່ອເປັນການຍ້ອງຍໍ ແລະ ສ້າງຂະບວນການໃຫ້ຟົດຟື້ນ.

ວັນສາທາລະນະສຸກລາວ (ວັນແພດລາວ) ກົງກັບວັນທີ 18 ມິຖຸນາ ຂອງທຸກໆປີ ເຊິ່ງເປັນວັນທີ່ມີຄວາມໝາຍຄວາມສຳຄັນທາງປະຫວັດສາດ, ຖືກກຳນົດຂຶ້ນເພື່ອລະນຶກເຖິງຜົນງານ ແລະ ຄຸນງາມຄວາມດີຂອງແພດລາວ ໃນສະໄໝຕໍ່ສູ້ກູ້ຊາດ ກໍຄືໃນສະໄໝປົກປັກຮັກສາ ແລະ ສ້າງສາພັດທະນາປະເທດຊາດ; ທັງເປັນການປຸກລະດົມມວນຊົນ ໃຫ້ເຫັນຄວາມສຳຄັນ, ຄວາມເຂົ້າໃຈ ແລະ ເປັນເຈົ້າການໃນການສົ່ງເສີມການບໍລິການຮັກສາສຸຂະພາບ ຂອງຄອບຄົວ ແລະ ສັງຄົມ, ພ້ອມທັງຈາລຶກບຸນຄຸນຂອງແພດໝໍ ແລະ ພະນັກງານສາທາລະນະສຸກ ທີ່ໄດ້ເສຍສະຫຼະອຸທິດສະຕິປັນຍາ ແລະ ເຫື່ອແຮງເຂົ້າໃນການປະຕິບັດໜ້າທີ່ວິຊາສະເພາະ ໃນແຕ່ລະໄລຍະ.

ໂຮງໝໍມະໂຫສົດ ຮ່ວມກັບ ມູນນິທິ ພັດທະນາລ້ານຊ້າງ-ແມ່ຂອງ. ຈັດກິດຈະກໍາ “ຮອຍຍິ້ມຂອງແມ່-ຄວາມຮັກໃນລາວ ປີ 2026”, ການຜ່າຕັດຟື້ນຟູປາກແຫວ່ງ ແລະ ເພດານໂຫວ່ ໂດຍເສຍຄ່າປິ່ນປົວ (ຟຣີ)

Posted on June 10, 2026June 10, 2026 by Mahosot_H Admin

ພິທີສະເຫຼີມສະຫຼອງ ວັນພະຍາບານສາກົນ ວັນທີ 12 ພຶດສະພາ ປະຈຳປີ 2026

Posted on June 8, 2026June 10, 2026 by Mahosot_H Admin

ວັນທີ 12 ພຶດສະພາ 2026, ໂຮງໝໍມະໂຫສົດ ໄດ້ຈັດພິທີສະເຫຼີມສະຫຼອງວັນພະຍາບານສາກົນ ປະຈຳປີ 2026 ເພື່ອເປັນການລະນຶກ ແລະ ຮູ້ບຸນຄຸນເຖິງ ທ່ານ ນ. ຟໍເຣັນສ ໄນຕິງເກລ ເຊິ່ງເປັນຜູ້ໃຫ້ກໍາເນີດວິຊາຊີບພະຍາບານ. ໂດຍການເປັນປະທານຂອງ ທ່ານ ດຣ. ບຸນໂຮມ ກັນທະວົງ ຮອງຜູ້ອຳນວຍການໂຮງໝໍມະໂຫສົດ ແລະ ທ່ານ ນ. ບົວວັນ ປະທຸມທອງ ຮອງຜູ້ອຳນວຍການໂຮງໝໍມະໂຫສົດ ເຊິ່ງມີພາກສ່ວນຕ່າງໆເຂົ້າຮ່ວມເຊັ່ນ: ຄະນະພັກ, ຄະນະອຳນວຍການ, ສາມອົງການຈັດຕັ້ງມະຫາຊົນ, ໂຮງໝໍສູນກາງ, ວິທະຍາໄລ ວິທະຍາສາດສຸຂະພາບ, ຜູ້ຕາງໜ້າອົງການ JICA, ຄະນະພະແນກ,ຄະນະຂະແໜງ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມ.
ທ່ານ ດຣ. ບຸນໂຮມ ກັນທະວົງ ຮອງຜູ້ອຳນວຍການໂຮງໝໍມະໂຫສົດ ໄດ້ກ່າວເປີດພິທີ ແລະ ທ່ານ ນ. ບົວວັນ ປະທຸມທອງ ຮອງຜູ້ອຳນວຍການໂຮງໝໍມະໂຫສົດ ໄດ້ຂຶ້ນຜ່ານປະຫວັດຄວາມເປັນມາ ແລະ ການພັດທະນາຂອງພະຍາບານວັນພະຍາບານສາກົນ, ຄະນະພະແນກພະຍາບານໄດ້ຂຶ້ນຜ່ານຜົນງານການເຄື່ອນໄຫວກິດຈະກໍາຂອງພະຍາບານ, ໂຮງໝໍມະໂຫສົດ ໃນປີ 2025-2026 ເຊັ່ນ: ກວດກັນກອງພະຍາດເບົາຫວານ, ວັດແທກຄວາມດັນເລືອດ, ຄິດໄລ່ການດຸ່ນດ່ຽງຄວາມສົມບູນຂອງຮ່າງກາຍ (BMI) ໃກ້ແກ່ພະນັກງານ ແລະ ຜູ້ມາຮັບບໍລິການ, ສິດສອນນັກຮຽນຢູ່ໂຮງຮຽນປະຖົມສົມບູນທາດຂາວ ໃນການອະນາໄມຜົ້ງປາກ, ຖູແຂ້ວ, ການລ້າງມື, ການທຳຄວາມສະອາດເລັບມື ແລະ ການຕັດເລັບ ເປັນຕົ້ນ.
ທ່ານປະທານໄດ້ກ່າວມີຄໍາເຫັນ, ພະຍາບານແມ່ນດ່ານໜ້າທີ່ຢູ່ກັບຄົນເຈັບຕະຫຼອດເວລາພວກເຂົາບໍ່ພຽງແຕ່ປິ່ນປົວທາງຮ່າງກາຍ ແຕ່ຍັງເປັນທີ່ເເພິ່ງທາງຈິດໃຈໃຫ້ແກ່ຄົນເຈັບ ແລະ ພີ່ນ້ອງຄົນເຈັບ, ໂດຍສະເພາະທ່ານໝໍ ແລະ ພະຍາບານປຽບເໝືອນ ແຂນຊ້າຍ-ແຂນຂວາ ທີ່ຂາດກັນບໍ່ໄດ້,ທ່ານໝໍເປັນຜູ້ວາງແຜນການປິ່ນປົວ ພະຍາບານແມ່ນຜູ້ປະຕິບັດ, ຕິດຕາມ ແລະ ເຝົ້າລະວັງ ເພື່ອເຮັດໃຫ້ຄົນເຈັບຫຼຸດພົ້ນຈາກຄວາມເຈັບປວດ ຫຼື ພະຍາດກາຍມາເປັນຄົນທີ່ມີສຸຂະພາບແຂງແຮງ, ສາມາດໍາລົງຊີວິດໃນສັງຄົມຢ່າງປົກກະຕິ ແລະ ມີຄຸນນະພາບຊີວິດທີ່ດີ ພາຍໃຕ້ຄຳຂັນ ວັນພະຍາບານສາກົນ ປີ 2026 “ພະຍາບານຄື ອານາຄົດ, ພະລັງການພະຍາບານ ຄື ການຊ່ວຍຊີວິດ”.

ພິທີສະເຫຼີມສະຫຼອງ ວັນເດັກນ້ອຍສາກົນ ຄົບຮອບ 102 ປີ,ໂຮງໝໍມະໂຫສົດ.

Posted on June 4, 2026June 8, 2026 by Mahosot_H Admin

ວັນທີ 28 ພຶດສະພາ 2026, ໄດ້ຈັດພິທີສະເຫຼີມສະຫຼອງ ວັນເດັກນ້ອຍສາກົນ ຄົບຮອບ 102 ປີ ແລະ ວັນປູກຕົ້ນໄມ້ແຫ່ງຊາດ ປະຈຳປີ 2026, ໂຮງໝໍມະໂຫສົດ ພາຍໃຕ້ຄຳຂັວນ: “ຮັກເດັກ, ຮັກຊາດ, ຮັກຕົ້ນໄມ້ ແລະ ເອົາໃຈໃສ່ສິ່ງແວດລ້ອມ”. ໃຫ້ກຽດການເປີດພິທີຂອງ ທ່ານ ປອ.ດຣ ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ເຊິ່ງມີພາກສ່ວນຕ່າງໆເຂົ້າຮ່ວມເຊັ່ນ: ຄະນະພັກ, ຄະນະອຳນວຍການ, ຄະນະພະແນກ, ຄະນະຂະແໜງ,ພະນັກງານແພດໝໍ-ພະຍາບານ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມ.
ທ່ານ ປອ.ດຣ ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ໄດ້ກ່າວເປີດພິທີ ແລະ ເລົ່າມູນເຊື້ອຄວາມເປັນມາຂອງວັນເດັກນ້ອຍສາກົນ. ພິທີດັ່ງກ່າວ ໄດ້ຈັດຂຶ້ນເພື່ອເປັນການສະແດງເຖິງຄວາມຮັກ, ຄວາມເອົາໃຈໃສ່ ແລະ ການປົກປ້ອງສິດທິຂອງເດັກນ້ອຍເຊິ່ງເປັນໜໍ່ແໜງຂອງຊາດ,ມີກິດຈະກຳສະແດງຄວາມກ້າຫານ ແລະ ຄວາມສາມາດເພື່ອໃຫ້ເດັກນ້ອຍໄດ້ຮ່ວມມ່ວນຊື່ນ, ສ້າງຮອຍຍິ້ມ ແລະ ສີສັນພາຍໃນໂຮງໝໍ, ຍັງມີການໃຫ້ຄວາມຮູ້ແກ່ເດັກນ້ອຍໃນການກິນອາຫານແບບໃດຈຶ່ງບໍ່ອ້ວນ, ການຈັດການກັບເດັກຕິດຈໍ, ການຮັກສາສຸຂະພາບຕາ ແລະ ການຖູແຂ້ວໃຫ້ຖຶກວິທີ. ພ້ອມກັນນັ້ນ, ຄະນະນຳໂຮງໝໍມະໂຫສົດ ພ້ອມດ້ວຍທີມງານແພດໝໍ ໄດ້ລົງຢ້ຽມຢາມ ເດັກນ້ອຍທີ່ນອນປິ່ນປົວຢູ່ຕາມຕຶກຕ່າງໆ ພ້ອມທັງມອບເຂົ້າໜົມ ເພື່ອສ້າງຂວັນກຳລັງໃຈໃຫ້ແກ່ນ້ອງໆ ໃຫ້ມີສຸຂະພາບແຂງແຮງ ແລະ ຫາຍດີໄວໆ.

ກິດຈະກຳປູກຕົ້ນໄມ້ແຫ່ງຊາດ ປະຈຳປີ 2026, ໂຮງໝໍມະໂຫສົດ.

Posted on June 4, 2026June 25, 2026 by Mahosot_H Admin

ໃນວັນທີ 28 ພຶດສະພາ 2026, ໂຮງໝໍມະໂຫສົດ, ໄດ້ຈັດກິດຈະກຳປູກຕົ້ນໄມ້ແຫ່ງຊາດ ປະຈຳປີ 2026 ຂຶ້ນຢ່າງເປັນຂະບວນການຟົດຟື້ນ ໂດຍໄດ້ຮັບກຽດຈາກ ທ່ານ ປອ.ດຣ. ຊູຊາດ ວົງພະຈັນ ເລຂາຄະນະພັກຮາກຖານ ແລະ ຜູ້ອຳນວຍການໂຮງໝໍມະໂຫສົດ ເປັນປະທານພິທີ ພ້ອມດ້ວຍຄະນະພັກ-ຄະນະນຳ ແລະ ພະນັກງານຂອງໂຮງໝໍ ເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ ໄດ້ຮ່ວມກັນປູກຕົ້ນດອກເຈ້ຍ ແລະ ຕົ້ນໄມ້ກິນໝາກ ລວມທັງໝົດ 91 ຕົ້ນ ເພື່ອປະດັບພູມີທັດໃຫ້ສວຍງາມ ສະອາດ ຮົ່ມເຢັນ ແລະ ສົ່ງເສີມການອະນຸລັກສິ່ງແວດລ້ອມ. ພິເສດຢ່າງຍິ່ງ ໂຮງໝໍມະໂຫສົດ ຂໍສະແດງຄວາມຂອບໃຈ ແລະ ຊົມເຊີຍຢ່າງສູງຕໍ່ ທ່ານ ຄຳພອນ ພຸດທະວົງ ອະດີດຮອງເລຂາຄະນະພັກ ແລະ ອະດີດຮອງລັດຖະມົນຕີ ກະຊວງສາທາລະນະສຸກ ພ້ອມຄະນະທີມງານຈາກກະຊວງສາທາລະນະສຸກ ທີ່ໄດ້ໃຫ້ກຽດເຂົ້າຮ່ວມກິດຈະກຳປູກຕົ້ນດອກເຈ້ຍ ໃນລະຫວ່າງເດີນທາງມາກວດສຸຂະພາບທີ່ໂຮງໝໍ. ຕົ້ນໄມ້ທີ່ໄດ້ຮ່ວມປູກໃນຄັ້ງນີ້ຈະເປັນສິລິມຸງຄຸນ ແລະ ເປັນທີ່ລະນຶກອັນດີງາມ ປະດັບໄວ້ຄູ່ກັບໂຮງໝໍມະໂຫສົດຕະຫຼອດໄປ.