Mahosot_H Admin - ໂຮງໝໍມະໂຫສົດ | Mahosot Hospital

ທ່ານ ບຸນຕາ ເທບພະວົງ ກຳມະການສຳຮອງສູນກາງພັກ, ກຳມະການຄະນະປະຈຳ, ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ພ້ອມດ້ວຍຄະນະ ລົງຢ້ຽມຢາມ, ເຄື່ອນໄຫວຕິດຕາມກວດກາ ແລະ ຊຸກຍູ້ການເຄື່ອນໄຫວ ຢູ່ໂຮງໝໍມະໂຫສົດ.

Posted on October 10, 2025October 10, 2025 by Mahosot_H Admin

ວັນທີ 02 ຕຸລາ 2025 ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ໄດ້ຮັບຕ້ອນ ທ່ານ ບຸນຕາ ເທບພະວົງ ກຳມະການສຳຮອງສູນກາງພັກ, ກຳມະການຄະນະປະຈຳ, ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ພ້ອມດ້ວຍຄະນະ ແລະ ທ່ານ ນ. ສຸລິພອນ ສຸດາຈັນ ຮອງຫົວໜ້າ ກົມປິ່ນປົວ ແລ ຟື້ນຟູໜ້າທີ່ການ ພ້ອມດ້ວຍທີມງານ ລົງຢ້ຽມຢາມ, ຕິດຕາມກວດກາ ແລະ ຊູກຍູ້ການເຄື່ອນໄຫວການບໍລິການສຸຂະພາບ ຂອງໂຮງໝໍມະໂຫສົດ. ໃນນັ້ນ, ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ໄດ້ລາຍງານ ສະພາບລວມການເຄື່ອນໄຫວການບໍລິການສຸຂະພາບ, ການກຳນົດລາຄາຄ່າປິ່ນປົວໃນໄລຍະຜ່ານມາ ແລະ ສະເໜີຄະນະນຳມີການຍ້ອງຍໍໃຫ້ແກ່ພະນັກງານແພດໝໍ, ພະຍາບານ ຂອງໂຮງໝໍມະໂຫສົດ ທີ່ປະຕິບັດໜ້າທີ່ຮັບໃຊ້ຊາດ. ໃນນັ້ນ ທ່ານ ນ. ສຸລິພອນ ສຸດາຈັນ ຮອງຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ໄດ້ສະເໜີມີການຍົກລະດັບຂອງພະນັກງານແພດໝໍ ແລະ ພະຍາບານໃຫ້ຫຼາຍຂຶ້ນ ໃນສະຖານທີ່ບໍລິການປິ່ນປົວຂອງລັດ. ການລົງຢ້ຽມຢາມຄັ້ງນີ້ ທ່ານ ບຸນຕາ ເທບພະວົງ ກຳມະການສຳຮອງສູນກາງພັກ, ກຳມະການຄະນະປະຈຳ, ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ມີຄຳເຫັນ ແລະ ຍ້ອງຍໍຊົມເຊີຍພະນັກງານແພດໝໍ ທີ່ເສຍສະຫຼະປະຕິບັດໜ້າທີ່ ຮັບໃຊ້ບໍລິການທາງດ້ານສຸຂະພາບ ໃຫ້ແກ່ພໍ່ແມ່ປະຊາຊົນບັນດາເຜົ່າໃນໄລຍະຜ່ານມາ ແລະ ເຮັດໃຫ້ເກີດຄວາມເພິ່ງພໍ່ໃຈໃນການບໍລິການ.

ພິທີຮັບຕ້ອນ ທ່ານ Pio Smith ຜູ້ອຳນວຍການ UNFPA ປະຈຳພາກພື້ນອາຊີ ແລະ ປາຊີຟິກ (APRO) ລົງຢ້ຽມຢາມໂຮງໝໍມະໂຫສົດ.

Posted on October 7, 2025October 7, 2025 by Mahosot_H Admin

ວັນທີ 30 ກັນຍາ 2025, ໄດ້ມີພິທີຮັບຕ້ອນ ທ່ານ Pio Smith ຜູ້ອຳນວຍການ UNFPA ປະຈຳພາກພື້ນອາຊີ ແລະ ປາຊີຟິກ (APRO), ເຊິ່ງນຳພາຄະນະຮັບຕ້ອນໂດຍທ່ານ ນ. ອາພອນ ວິຊາເທບ ຮອງລັດຖະມົນຕີກະຊວງສາທາລະນະສຸກ, ຄະນະອຳນວຍການ, ທີມງານຮັບຜິດຊອບ ແລະ ຜູ້ຕາງໜ້າຂອງອົງການ UNFPA. ການລົງຢ້ຽມຢາມຄັ້ງນີ້ມີ 02 ຈຸດປະສົງ ເຊັ່ນ: ແມ່ນຮັບການລາຍງານການຈັດຕັ້ງປະຕິບັດຂອງ ສູນໃຫ້ຄວາມຊ່ວຍເຫຼືອແມ່ຍິງ ແລະ ເດັກ ທີ່ຖຶກເຄາະຮ້າຍຈາກການໃຊ້ຄວາມຮຸນແຮງ ແລະ ການຄ້າມະນຸດ, ການລົງຢ້ຽມຢາມສູນດັ່ງກ່າວ ແລະ ຕິດຕາມການບໍລິການສຸຂະພາບແມ່ ແລະ ເດັກ.
ໃນນັ້ນ, ທ່ານ ນ. ອາພອນ ວິຊາເທບ ຮອງລັດຖະມົນຕີກະຊວງສາທາລະນະສຸກ ໄດ້ກ່າວຮັບຕ້ອນແລ ຂໍສືບຕໍ່ການສະໜັບສະໜູນ ໃນການຈັດຕັ້ງປະຕິບັດ ເນື່ງຈາກວ່າ, ສູນດັ່ງກ່າວແມ່ນມີຄວາມສຳຄັນ ແລະ ຈຳເປັນໃນການຊ່ວຍເຫຼືອຜູ້ທີ່ເຄາະຮ້າຍຈາກການໃຊ້ຄວາມຮຸນແຮງ ແລະ ການຄ້າມະນຸດ.

ກອງປະຊຸມວິຊາການ ການແລກປ່ຽນປະສົບການ, ການພັດທະນາຄວາມຮ່ວມມື ໃນການຜ່າຕັດເສັ້ນເລືອດຫົວໃຈ ແລະ ປິ່ນປົວພະຍາດຫົວໃຈ (KKU-Mahosot Hospital) ຄັ້ງທີ 11.

Posted on September 16, 2025September 16, 2025 by Mahosot_H Admin

ວັນທີ 29-30 ສິງຫາ 2025 ໂຮງໝໍມະໂຫສົດ ແລະ ສູນຫົວໃຈ ສິລິກິດ ພາກຕາເວັນອອກສຽງເໜືອ, ຄະນະແພດສາດ ມະຫາວິທະຍາໄລ ຂອນແກ່ນ ຈັດກອງປະຊຸມວິຊາການ ການແລກປ່ຽນປະສົບການ, ການພັດທະນາຄວາມຮ່ວມມື ໃນການຜ່າຕັດເສັ້ນເລືອດຫົວໃຈ ແລະ ປິ່ນປົວພະຍາດຫົວໃຈ (KKU-Mahosot Hospital) ຄັ້ງທີ 11. ໃຫ້ກຽດການເປັນປະທານໃນຄັ້ງນີ້ແມ່ນ ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ, ທ່ານ ດຣ. ຄຳແພງ ແກ້ງມະນີວົງ ຫົວໜ້າສູນຫຫົວໃຈ-ເສັ້ນເລືອດ, ທ່ານ Assist.Prof. Chawalit Wongbuddha Deputy Director of QSHC,KKU ແລະ ທ່ານ Asso.Prof. Sompop Prathanee Thorcic Surgery KKU. ເຊິ່ງມີຜູ້ເຂົ້າຮ່ວມຈາກພາກສ່ວນຕ່າງໆເຊັ່ນ: ຄະນະອຳນວຍການ, ທ່ານໝໍ, ພະຍາບານ ແລະ ວິຊາການ ໂຮງໝໍມະໂຫສົດ ແລະ ທີມງານຈາກ ມະຫາວິທະຍາໄລ ຂອນແກ່ນກໍ່ເຂົ້າຮ່ວມ.
ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ໄດ້ມີຄຳເຫັນ ແລະ ກ່າວເປີດກອງປະຊຸມວິຊາການ ການແລກປ່ຽນປະສົບການ, ການພັດທະນາຄວາມຮ່ວມມືໃນການຜ່າຕັດເສັ້ນເລືອດຫົວໃຈ ແລະ ປິ່ນປົວພະຍາດຫົວໃຈ (KKU-Mahosot Hospital) ຄັ້ງທີ 11 ຢ່າງເປັນທາງການ. ກອງປະຊຸມຄັ້ງນີ້ຈັດຂື້ນເພື່ອພັດທະນາການຮ່ວມມື, ເສີມສ້າງການຮຽນຮູ້ກ່ຽວກັບການຜ່າຕັດເສັ້ນເລືອດຫົວໃຈ ເຊັ່ນ: ການຜ່າຕັດເສັ້ນເລືອດຫົວໃຈຕີບ ແລະ ຜ່າຕັດເສັ້ນເລືອດໂພ່ງ ເປັນຕົ້ນ. ພາຍໃນກອງປະຊຸມຍັງມີການແລກປ່ຽນປະສົບການການຜ່າຕັດເສັ້ນເລືອດຫົວໃຈ ແລະ ການປິ່ນປົວພະຍາດຫົວໃຈ ຂອງທີມແພດ ສປປ ລາວ ແລະ ທີມແພດ ປະເທດໄທ, ເພື່ອເປັນການພັດທະນາ ແລະ ຍົກລະດັບທາງດ້ານວິຊາການໃນການບົ່ງມະຕິ ແລະ ການປິ່ນປົວພະຍາດຫົວໃຈໄດ້ທັນເວລາ ໃຫ້ແກ່ພໍ່ແມ່ປະຊາຊົນບັນດາເຜົ່າທີ່ໃຊ້ບໍລິການຢູ່ໂຮງໝໍມະໂຫສົດ.

ກອງປະຊຸມເຜີຍແຜ່ ຄູ່ມືການປະເມີນຄຸນນະພາບການບໍລິການປິ່ນປົວ ແລະ ຄຳແນະນຳວິທີໃຊ້ ຕາມແຜນພັດທະນາຄຸນນະພາບ ຂອງກການບໍລິການສຸຂະພາບ “ ຫ້າ ດີ ໜຶ່ງ ພໍໃຈ ” .

Posted on September 9, 2025September 11, 2025 by Mahosot_H Admin

ວັນທີ 27 ສິງຫາ 2025 ໂຮງໝໍມະໂຫສົດ ໄດັຈັດກອງປະຊຸມເຜີຍແຜ່ ຄູ່ມືການປະເມີນ ແລະ ຄຳແນະນຳວິທີ ໃຊ້ຄູ່ມືການພັດທະນາຄຸນນະພາບ ຂອງການບໍລິການສຸຂະພາບ “ ຫ້າດີ ໜຶ່ງ ພໍໃຈ” ໂດຍການເປັນປະທານຂອງ ທ່ານ ປອ ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ. ເຊິ່ງມີພາກສ່ວນຕ່າງໆເຊັ່ນ: ຄະນະອຳນວຍການ, ຄະນະພັກ, ຄະນະພະແນກ, ຄະນະຂະແໜງ, ທ່ານໝໍ ແລະ ພະຍາບານ, ມີຈຳນວນ 413 ທ່ານ, (ຍິງ 324 ທ່ານ).

ທ່ານ ນ. ບົວວັນ ປະທຸມທອງ ຮອງຜູ້ອຳນວຍການໂຮງໝໍມະໂຫສົດ, ນໍາສະເໜີແນວຄວາມຄິດຂອງຄຸນນະ ພາບການບໍລິການ, ຄວາມປອດໄພຂອງຄົນເຈັບ,ການປະເມີນ ແລະການວາງແຜນປັບປຸງຄຸນນະພາບ, ພ້ອມກັນນັ້ນ ທີມງານໄດ້ຂຶ້ນຜ່ານຄູ່ມື ແລະ ຄຳແນະນຳວິທີການນໍາໃຊ້ ເຄື່ອງມືປະເມີນຄຸນນະພາບການປິ່ນປົວແລະ ການດູແລສຸຂະພາບແບບຟອມປະເມີນ ການບໍລິການໂດຍເອົາຄົນເຈັບເປັນໃຈກາງ.

ກອງປະຊຸມດັ່ງກ່າວ ແມ່ນໄດ້ຈັດຂຶ້ນ 03 ຊຸດ, ເພື່ອໃຫ້ພະນັກງານທຸກຄົນໄດ້ເຂົ້າຮ່ວມຮັບຟັງ ແລະ ເຂົ້າ ໃຈຢ່າງທົ່ວເຖິງ, ໃນບາງຄໍາເຫັນຂອງທ່ານປະທານ ໄດ້ ກ່າວວ່າ: ການຈັດກອງປະຊຸມເຜີຍແຜ່ຄັ້ງນີ້ແມ່ນມີຄວາມສໍາຄັນຫຼາຍເພາະວ່າ ຢູ່ໃນໄລຍະການພັດທະນາວິຊາຊີບດ້ານວຽກງານສາທາລະນະສຸກ ແລະ ນະໂຍບາຍຂອງກະຊວງສາທາລະນະສຸກໄດ້ໃຫ້ຄວາມສໍາຄັນດ້ານການປິ່ນປົວແລະ ການດູແລສຸຂະພາບໃຫ້ມີຄຸນນະພາບ ໂດຍອີງໃສ່ເຄື່ອງມື/ຕົວຊີ້ວັດໃນການປະເມີນການຈັດຕັ້ງປະຕິບັດ ກໍ່ຄື “ ຫ້າ ດີ ໜຶ່ງ ພໍໃຈ” : ຮັບຕ້ອນດີ, ສະອາດດີ, ສະດວກດີ, ບົ່ງມະຕິພະຍາດຊັດເຈນດີ ແລະ ປິ່ນປົວດີໄວ ເພື່ອໃຫ້ຜູ້ມາຮັບບໍລິການເພິ່ງພໍໃຈ.

ກອງປະຊຸມວິຊາການປະຈຳປີ ສະມາຄົມແພດກະເພາະລຳໃສ້ ແລະ ຕັບລາວ ຄັ້ງທີ 03 ປະຈຳປີ 2025

Posted on September 3, 2025September 3, 2025 by Mahosot_H Admin

ວັນທີ 28 ສິງຫາ 2025 ໂຮງໝໍມະໂຫສົດ, ສະມາຄົມແພດກະເພາະລຳໃສ້ ແລະ ຕັບລາວ ແລະ ໂຮງໝໍຣາຊວິຖີ ປະເທດໄທ ຈັດກອງປະຊຸມວິຊາການປະຈຳປີ ສະມາຄົມແພດກະເພາະລຳໃສ້ ແລະ ຕັບລາວ ຄັ້ງທີ 03 ປະຈຳປີ 2025 ໃຫ້ກຽດການເປັນປະທານຂອງ ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ, ທ່ານ ຮສ.ດຣ. ບົວຈັນຣາຊຈັກ ປະທານສະມາຄົມ ແພດກະເພາະລຳໃສ້ ແລະ ຕັບລາວ ແລະ ທ່ານ ດຣ. ທະວີ ຣັດຕານາຊຸເອກ ໂຮງໝໍ ຣາຊວິຖີ ປະເທດໄທ. ຍັງມີໂຮງໝໍສູນກາງ, ໂຮງໝໍແຂວງ 12 ແຂວງ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມ.
ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ ໄດ້ກ່າວເປີດກອງປະຊຸມວິຊາການປະຈຳປີ ສະມາຄົມແພດກະເພາະລຳໃສ້ ແລະ ຕັບລາວ ຄັ້ງທີ 03 ປະຈຳປີ 2025 ຢ່າງເປັນທາງການ, ພາຍໃຕ້ຫົວຂໍ້ “ ພື້ນຖານການສ່ອງກະເພາະລຳໃສ້, ການຕັດຕິ່ງ ແລະ ການຢຸດເລືອດໄຫຼກະເພາະລຳໃສ້”.
ກອງປະຊຸມຄັ້ງນີ້ຈັດຂຶ້ນເພື່ອເປັນການເສີມສ້າງ, ການຮຽນຮູ້ກ່ຽວກັບພື້ນຖານທີ່ຖືກຕ້ອງໃນການສ່ອງກະເພາະລຳໃສ້ ແລະ ມີຄວາມສຳຄັນຢ່າງຍິ່ງໃນການບົ່ງມະຕິພະຍາດ ໃຫ້ມີການຄວາມຊັດເຈນ ແລະ ປອດໄພ. ນອກຈາກນີ້, ຍັງມີກິດຈະກຳການຝຶກອົບຮົມ, ການຮຽນຮູ້ທັກສະທາງດ້ານວິຊາການກ່ຽວກັບການປິ່ນປົ່ວພະຍາດຜ່ານກ້ອງເຊັ່ນ: , ເຕັກນິກການຕັດຕິ່ງຂະໜາດໃຫຍ່ ຢູ່ກະເພາະລຳໃສ້, ເຕັກນິກການຢຸດເຫຼືອດໄຫຼດ້ວຍ Hemoclip, ເປັນການຫຼຸດຜ່ອນການຜ່າຕັດ, ອັດຕາການຕາຍ ແລະ ອັດຕາການເປັນມະເຮັງໃນອະນາຄົດ.

ທ່ານ ນ. ທິບພາພອນ ໂພທິສານ (ຮ້ານ ຄຳສຳລານ ໂພທິສານ) ໄດ້ບໍລິຈາກເງີນຊ່ວຍເຫຼືອ ມູນຄ່າ: 20,000,000 ກີບ (ຊາວລ້ານກີບ) ໃຫ້ແກ່ໂຮງໝໍມະໂຫສົດ ເພື່ອນຳໃຊ້ເຂົ້າໃນການປິ່ນປົວຄົນເຈັບທຸກຍາກທີ່ບໍ່ມີຍາດ ຢູ່ໂຮງໝໍມະໂຫສົດ

Posted on August 8, 2025August 8, 2025 by Mahosot_H Admin

ວັນທີ 30 ກໍລະກົດ 2025 ທ່ານ ນ. ທິບພາພອນ ໂພທິສານ (ຮ້ານ ຄຳສຳລານ ໂພທິສານ) ໄດ້ບໍລິຈາກເງີນຊ່ວຍເຫຼືອ ມູນຄ່າ: 20,000,000 ກີບ (ຊາວລ້ານກີບ) ໃຫ້ແກ່ໂຮງໝໍມະໂຫສົດ ເພື່ອນຳໃຊ້ເຂົ້າໃນການປິ່ນປົວຄົນເຈັບທຸກຍາກທີ່ບໍ່ມີຍາດຢູ່ໂຮງໝໍມະໂຫສົດ ໃຫ້ກຽດການມອບ-ຮັບ ໂດຍ ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍໂຮງໝໍມະໂຫສົດ ພ້ອມດ້ວຍຄະນະ ແລະ ທ່ານ ນ. ທິບພາພອນ ໂພທິສານ (ຮ້ານ ຄຳສຳລານ ໂພທິສານ).

ທ່ານ ນ. Lu Jaing ຮອງຫົວໜ້າອົງການປ້ອງກັນ ແລະ ຄວບຄຸມພະຍາດຕິດຕໍ່ ແຫ່ງຊາດ ສປ ຈີນ ລົງຢ້ຽມຢາມໂຮງໝໍມະໂຫສົດ.

Posted on August 6, 2025August 6, 2025 by Mahosot_H Admin

ວັນທີ 30 ກໍລະກົດ 2025 ທ່ານ ບຸນໂຮມ ກັນທະວົງ ຮອງຜູ້ອຳນວຍການໂຮງໝໍມະໂຫສົດ ພ້ອມພາກສ່ວນທີ່ກ່ຽວຂ້ອງໄດ້ຕ້ອນຮັບ ທ່ານ ນ. Lu Jaing ຮອງຫົວໜ້າອົງການປ້ອງກັນ ແລະ ຄວບຄຸມພະຍາດຕິດຕໍ່ ແຫ່ງຊາດ ສປ ຈີນ ພ້ອມດ້ວຍທີມງານ ລົງຢ້ຽມຢາມໂຮງໝໍມະໂຫສົດ, ການພົບປະຄັ້ງນີ້ ທັງສອງພາກສ່ວນໄດ້ປຶກສາຫາລືໃນການຮ່ວມມື ທາງດ້ານວຽກງານການປ້ອງກັນ ແລະ ຄວບຄຸມພະຍາດຕິດຕໍ່, ທ່ານຍັງໄດ້ລົງໄປຢ້ຽມຢາມຫຼາຍໆພະແນກໃນໂຮງໝໍ ເພື່ອເປັນການຊຸກຍູ້, ເພີ່ມທະວີວຽກງານປ້ອງກັນການຄວບຄຸມພະຍາດຕິດຕໍ່ ແລະ ການຮ່ວມມືລະຫວ່າງ ສປ ຈີນ - ສປປ ລາວ.

ກອງປະຊຸມ ສະຫຼຸບການຈັດຕັ້ງເຄື່ອນໄຫວການບໍລິການສຸຂະພາບ 06 ເດືອນຕົ້ນປີ, ແຜນພັດທະນາ 06 ເດືອນທ້າຍປີ, ສະຫຼຸບການຈັດຕັ້ງເຄື່ອນໄຫວ ຂອງຄະນະພັກຮາກຖາ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ, ປະກາດໃຫ້ພະນັກງານພັກການ-ຮັບອຸດໜູນບຳນານ, ການແຕ່ງຕັ້ງຕຳແໜ່ງປະເພດ 4,5,6, ແລະ ເຜີຍແຜ່ ເຊື່ອມຊືມເອກະສານສໍາຄັນຂອງພັກຂອງຊາດ.

Posted on August 4, 2025August 28, 2025 by Mahosot_H Admin

ວັນທີ 31 ກໍລະກົດ 2025 ໂຮງໝໍມະໂຫສົດ ຈັດພິທີກອງປະຊຸມ ສະຫຼຸບການຈັດຕັ້ງເຄື່ອນໄຫວການບໍລິການສຸຂະພາບ 06 ເດືອນຕົ້ນປີ, ແຜນພັດທະນາ 06 ເດືອນທ້າຍປີ, ສະຫຼຸບການຈັດຕັ້ງເຄື່ອນໄຫວ ຂອງຄະນະພັກຮາກຖາ 06 ເດືອນຕົ້ນປີແລະ ທິດທາງແຜນການ 06 ເດືອນທ້າຍປີ, ປະກາດໃຫ້ພະນັກງານພັກການ-ຮັບອຸດໜູນບຳນານ, ການແຕ່ງຕັ້ງຕຳແໜ່ງປະເພດ 4,5,6, ແລະ ເຜີຍແຜ່ ເຊື່ອມຊືມເອກະສານສໍາຄັນຂອງພັກຂອງຊາດ. ໂດຍການເປັນປະທານຂອງ ທ່ານ ປອ.ດຣ ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ, ຄະນະພັກ, ຄະນະອຳນວຍການ, ຄະນະພະແນກ, ຄະນະຂະແໜງ, ສະມາຊິກພັກ, ພະນັກງານແພດໝໍ ແລະ ພະຍາບານ ກໍ່ໄດ້ເຂົ້າຮ່ວມ.
ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ໃຫ້ກຽດກ່າວເປີດພິທີກອງປະຊຸມຢ່າງເປັນທາງການ, ໃນກອງປະຊຸມທ່ານ ດຣ. ໄຄສີ ລາດຊະວົງ ຮອງຜູ້ອຳນວຍການໂຮງໝໍມະໂຫສົດ ຂື້ນຜ່ານບົດສະຫຼຸບການຈັດຕັ້ງເຄື່ອນໄຫວການບໍລິການສຸຂະພາບ 06 ເດືອນຕົ້ນປີ ແລະ ແຜນພັດທະນາ 06 ເດືອນທ້າຍປີ, ທ່ານ ດຣ. ບຸນໂຮມ ກັນທະວົງ ຮອງຜູ້ອຳນວຍການໂຮງໝໍມະໂຫສົດ ຜ່ານສະຫຼຸບການຈັດຕັ້ງເຄື່ອນໄຫວ ຂອງຄະນະພັກຮາກຖານ 6 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ;
ທ່ານ ດຣ. ສຸມ ສີສະເກດ ຫົວໜ້າພະແນກຈັດຕັ້ງ-ພະນັກງານ ຂຶ້ນຜ່ານຂໍ້ຕົກລົງ ວ່າດ້ວຍການອະນຸມັດ ໃຫ້ພະນັກງານ-ລັດຖະກອນ ພັກການຮັບອຸດໜູນບຳນ, ຂໍ້ຕົກລົງວ່າດ້ວຍການແຕ່ງຕັ້ງຫົວໜ້າ ແລະ ຮອງຫົວໜ້າພະແນກຂອງໂຮງໝໍ, ຂໍ້ຕົກລົງວ່າດ້ວຍການແຕ່ງຕັ້ງຫົວໜ້າ ແລະ ຮອງຫົວໜ້າຂະແໜງ ຂອງສູນຫົວໃຈ-ເສັ້ນເລືອດ ໂຮງໝໍມະໂຫສົດ ແລະ ມະຕິຕົກລົງວ່າດ້ວຍການມອບໃບຢັ້ງຢືນ ໜ່ວຍພັດປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2024. ຍັງມີພິທີມອບຂໍ້ຕົກລົງໃຫ້ແກ່ພະນັກງານ-ລັດຖະກອນ ທີ່ພັກການ-ຮັບອຸດໜູບຳນານ, ພະນັກງານທີ່ໄດ້ຮັບຕຳແໜ່ງໃໝ່ ແລະ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2024 ໃຫ້ແກ່ 10 ໜ່ວຍພັກຂອງ ໂຮງໝໍມະໂຫສົດ.
ຫຼັງຈາກນັ້ນ, ທ່ານປະທານ ກໍ່ໃຫ້ກຽດເຜີຍແຜ່-ເຊື່ອມຊືມ ເອກະສານສຳຄັນຂອງພັກ ຂອງຊາດ, ຍ້ອງຍໍຊົມເຊີຍ ພະນັກງານ-ລັດຖະກອນ ທີ່ໄດ້ຮັບອຸດໜູນບຳນານ ທີ່ເສຍສະຫຼະເຮັດໜ້າທີ່ແພດໝໍຕະຫຼອດໄລຍະຜ່ານມາ, ປະກອບສ່ວນອຸດທິເຫື່ອແຮງ ແລະ ສະຕິປັນຍາ ເຂົ້າໃນພາລະກິດທີ່ຖຶກມອບໝາຍ ກາຍເປັນແບບຢ່າງທີ່ດີ ໃຫ້ແກ່ພະນັກງານລຸ້ນຫຼັງ ຂອງໂຮງໝໍມະໂຫສົດ. ໃນນັ້ນ, ທ່ານປະທານ ຍັງໃຫ້ທິດຊີ້ນຳ,ໂອ້ລົມ ແລະ ຊົມເຊີຍ ບັນດາພະນັກງານ-ລັດຖະກອນ ທີ່ໄດ້ຮັບຕຳແໜງຫົວໜ້າພະແນກ, ຮອງຫົວໜ້າພະແນກ, ຫົວໜ້າຂະແໜງ ແລະ ຮອງຫົວໜ້າຂະແໜງທີ່ໄດຮັບຕຳແໜງໃໝ່.

ພິທີສະເຫຼີມສະຫຼອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 70 ປີ, ຂອງໂຮງໝໍມະໂຫສົດ.

Posted on August 1, 2025January 7, 2026 by Mahosot_H Admin

ວັນທີ17 ກໍລະກົດ 2025 ໂຮງໝໍມະໂຫສົດ ໄດ້ຈັດພິທີສະເຫຼີມສະຫຼອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ70 ປີ (20 ກໍລະກົດ 1955 – 20 ກໍລະກົດ 2025) ໂດຍໃຫ້ກຽດການເປັນປະທານຂອງ ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ, ທ່ານ ນ. ໂພຄຳ ຊາວົງໄຊ ປະທານສະຫະພັນແມ່ຍິງໂຮງໝໍມະໂຫສົດໃນນັ້ນຍັງມີ ຄະນະພັກ, ຄະນະອຳນວຍການ, ຄະນະບໍລິຫານງານຊາວໜຸ່ມ, ຄະນະບໍລິຫານງານກຳມະບານ, ພະນັກງານອາວຸໂສບຳນານ, ພະນັກງານແພດໝໍ, ພະຍາບານ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມຢ່າງຝົດຟື້ນ.
ທ່ານ ປອ.ດຣ. ຊູຊາດ ວົງພະຈັນຜູ້ອຳນວຍການໂຮງໝໍມະໂຫສົດ ໄດ້ກ່າວເປີດພິທີ, ໃຫ້ຄຳເຫັນ, ຍ້ອງຍໍຊົມຊີຍສະຫະພັນແມ່ຍິງໂຮງໝໍມະໂຫສົດ ແລະ ໃຫ້ທິດຊີ້ນຳໃນການຈັດຕັ້ງປະຕິບັດວຽກງານຂອງສະຫະພັນແມ່ຍິງ. ທ່ານ ນ. ໂພຄຳ ຊາວົງໄຊ ປະທານສະຫະພັນແມ່ຍິງໂຮງໝໍມະໂຫສົດ ໄດ້ຜ່ານບົດສະຫຼຸບວຽກງານການຈັດຕັ້ງປະຕິບັດປະຈຳປີ2024 ແລະ ແຜນພັດທະນາ ປີ2025 ຂອງສະຫະພັນແມ່ຍິງ ໂຮງໝໍມະໂຫສົດ, ທ່ານ ນ. ໜໍ່ຄຳ ບຸດຕະວົງ ຮອງປະທານສະຫະພັນແມ່ຍິງ ໂຮງໝໍມະໂຫສົດ ໄດ້ເລົ່າມູນເຊື້ອ, ປະຫວັດຄວາມເປັນມາຂອງວັນສ້າງຕັ້ງສະຫະພັນແມ່ຍິງລາວ. ໃນນັ້ນ, ຍັງມີການມອບໃບຍ້ອງຍໍ ຂໍ້ແຂ່ງຂັນ 03 ດີ ໃຫ້ແກ່ຫົວໜ້າຈຸ ແລະ ສະມາຊິກສະຫະພັນແມ່ຍິງ ໂຮງໝໍມະໂຫສົດ, ຍັງໄດ້ຈັດກິດຈະກຳ ການກວດຄັດກອງມະເຮັງເຕົ້ານົມ ດ້ວຍເຄື່ອງ Ultrasound ແລະ ປະເມີນໂພຊະນາການ, ສິລະປະ, ຮ້ອງເພງ, ຫຼິ້ນເກມປະກອບຄຳ, ຕອບຄຳຖາມ ແລະ ເປີດຕະຫຼາດນັດຂາຍສິນຄ້າ ພາຍໃນໂຮງໝໍມະໂຫສົດ.
ໃນທຸກໆປີ ໂຮງໝໍມະໂຫສົດຈະມີການຈັດງານພິທີສະເຫຼີມສະຫຼອງ ປີລະ02 ຄັ້ງ ບໍ່ວ່າ ຈະເປັນວັນແມ່ຍິງສາກົນວັນທີ 8 ມີນາ ແລ ະວັນສ້າງຕັ້ງສະຫະພັນແມ່ຍິງລາວ ວັນທີ20 ກໍລະກົດ ເພື່ອເປັນການເຜີຍແຜ່ ເຊື່ອມຊືມປະຫວັດການກຳເນີດ, ການເຕີບໃຫຍ່, ການຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ, ໃຫ້ສະມາຊິກສະຫະພັນແມ່ຍິງແຕ່ລະພາກສ່ວນໄດ້ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງເພື່ອເປັນການປຸກລະດົມ, ຈິດສຳນຶກໃນການອານຸລັກຮັກສາ ແລະ ເສີມຂະຫຍາຍຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນດາເຜົ່າ ເພື່ອເພີ່ມທະວີຄວາມຮັບຜິດຊອບ ຂອງຄະນະ ແລະ ສະມາຊິກສະຫະພັນແມ່ຍິງ ໃນການຈັດຕັ້ງປະຕິບັດຄຳຂວັນ ແລະ ຂໍ້ແຂ່ງຂັນ 03 ດີຂອງສະຫະພັນແມ່ຍິງລາວ.

ຫັດຖະການ ການສ່ອງຫຼອດປອດ (Bronchoscopie) ຂອງພະແນກພະຍາດປອດ ແລະ ວັນນະໂລກ

Posted on July 30, 2025January 7, 2026 by Mahosot_H Admin

ພະແນກພະຍາດປອດ ແລະ ວັນນະໂລກ, ໂຮງໝໍມະໂຫສົດ ເປັນພະແນກໜຶ່ງ ທີ່ປິ່ນປົວພະຍາດລະບົບຫາຍໃຈ, ແລະ ມີການສ່ອງຫຼອດປອດ (Bronchoscopie) ດ້ວຍເຄື່ອງອຸປະກອນການແພດທີ່ທັນສະໄໝ ເພື່ອກວດເບິ່ງລະບົບທາງເດີນຫາຍໃຈ ໃນການບົ່ງມະຕິພະຍາດ ແລະ ປິ່ນປົວ. ການສ່ອງຫຼອດປອດ ແມ່ນຫັດຖະການທາງການແພດ ທີ່ມີຄວາມສ່ຽງຕຳ ທີ່ຊ່ວຍໃຫ້ທ່ານໝໍໄດ້ກວດເບິ່ງລະບົບທາງເດີນຫາຍໃຈ ແລະ ປອດຂອງຄົນເຈັບ, ພະຍາດທີ່ພົບເຫັນໃນການສ່ອງຫຼອດປອດ ສ່ວນຫຼາຍແມ່ນພົບພະຍາດມະເຮັງປອດ ແລະ ຫຼອດປອດ,ພະຍາດວັນນະໂລກ, ອັກເສບປອດ, ປອດຕິດເຊື້ອລາ, ວັດຖຸແປກປອມ ແລະ ອື່ນໆ.
ວັນທີ 09 ກໍລະກົດ 2025 ພະແນກພະຍາດປອດ ແລະ ວັນນະໂລກ ໄດ້ເຮັດຫັດຖະການ ການສ່ອງຫຼອດປອດ (Bronchoscopie) ຄົນເຈັບ ເພດຍິງ ອາຍຸ 71 ປີ ບ້ານໃຫຍ່, ເມືອງບໍ່ແຕນ, ແຂວງໄຊຍະບູລີ. ເພື່ອກວດເບິ່ງລະບົບທາງເດີນຫາຍໃຈຂອງປອດ ແລະ ເກັບຕົວຢ່າງ ໄປວິໃຈຫາພະຍາດເພື່ອບົ່ງມະຕິພະຍາດ ແລະ ປິ່ນປົວຕາມຫຼັກວິຊາການ. ການສ່ອງຫຼອດປອດ ແມ່ນນຳໃຊ້ເຄື່ອງອຸປະກອນການແພດທີ່ທັນສະໄໝ, ສ່ອງຜ່ານກ້ອງທີ່ມີຂະໜາດນ້ອຍ, ການສ່ອງຫຼອດປອດແມ່ນໃຊ້ເວລາ 20-40 ນາທີ, ການສ່ອງແມ່ນສ່ອງຜ່ານທາງຊ່ອງດັງຂອງຄົນເຈັບ, ຈະມີການພົ່ນມຶນສະເພາະທີ່ເພຶ່ອຫຼຸດຜ່ອນການເຈັບປວດຂອງຄົນເຈັບ ແລະ ເປັນທີ່ເພິ່ງພໍໃຈຂອງຜູ້ທີ່ມາໃຊ້ບໍລິການສຸຂະພາບ ຢູ່ໂຮງໝໍມະໂຫສົດ.