ວັນທີ 30 ກໍລະກົດ 2025 ທ່ານ ນ. ທິບພາພອນ ໂພທິສານ (ຮ້ານ ຄຳສຳລານ ໂພທິສານ) ໄດ້ບໍລິຈາກເງີນຊ່ວຍເຫຼືອ ມູນຄ່າ: 20,000,000 ກີບ (ຊາວລ້ານກີບ) ໃຫ້ແກ່ໂຮງໝໍມະໂຫສົດ ເພື່ອນຳໃຊ້ເຂົ້າໃນການປິ່ນປົວຄົນເຈັບທຸກຍາກທີ່ບໍ່ມີຍາດຢູ່ໂຮງໝໍມະໂຫສົດ ໃຫ້ກຽດການມອບ-ຮັບ ໂດຍ ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍໂຮງໝໍມະໂຫສົດ ພ້ອມດ້ວຍຄະນະ ແລະ ທ່ານ ນ. ທິບພາພອນ ໂພທິສານ (ຮ້ານ ຄຳສຳລານ ໂພທິສານ).
ວັນທີ 30 ກໍລະກົດ 2025 ທ່ານ ບຸນໂຮມ ກັນທະວົງ ຮອງຜູ້ອຳນວຍການໂຮງໝໍມະໂຫສົດ ພ້ອມພາກສ່ວນທີ່ກ່ຽວຂ້ອງໄດ້ຕ້ອນຮັບ ທ່ານ ນ. Lu Jaing ຮອງຫົວໜ້າອົງການປ້ອງກັນ ແລະ ຄວບຄຸມພະຍາດຕິດຕໍ່ ແຫ່ງຊາດ ສປ ຈີນ ພ້ອມດ້ວຍທີມງານ ລົງຢ້ຽມຢາມໂຮງໝໍມະໂຫສົດ, ການພົບປະຄັ້ງນີ້ ທັງສອງພາກສ່ວນໄດ້ປຶກສາຫາລືໃນການຮ່ວມມື ທາງດ້ານວຽກງານການປ້ອງກັນ ແລະ ຄວບຄຸມພະຍາດຕິດຕໍ່, ທ່ານຍັງໄດ້ລົງໄປຢ້ຽມຢາມຫຼາຍໆພະແນກໃນໂຮງໝໍ ເພື່ອເປັນການຊຸກຍູ້, ເພີ່ມທະວີວຽກງານປ້ອງກັນການຄວບຄຸມພະຍາດຕິດຕໍ່ ແລະ ການຮ່ວມມືລະຫວ່າງ ສປ ຈີນ - ສປປ ລາວ.
ວັນທີ 31 ກໍລະກົດ 2025 ໂຮງໝໍມະໂຫສົດ ຈັດພິທີກອງປະຊຸມ ສະຫຼຸບການຈັດຕັ້ງເຄື່ອນໄຫວການບໍລິການສຸຂະພາບ 06 ເດືອນຕົ້ນປີ, ແຜນພັດທະນາ 06 ເດືອນທ້າຍປີ, ສະຫຼຸບການຈັດຕັ້ງເຄື່ອນໄຫວ ຂອງຄະນະພັກຮາກຖາ 06 ເດືອນຕົ້ນປີແລະ ທິດທາງແຜນການ 06 ເດືອນທ້າຍປີ, ປະກາດໃຫ້ພະນັກງານພັກການ-ຮັບອຸດໜູນບຳນານ, ການແຕ່ງຕັ້ງຕຳແໜ່ງປະເພດ 4,5,6, ແລະ ເຜີຍແຜ່ ເຊື່ອມຊືມເອກະສານສໍາຄັນຂອງພັກຂອງຊາດ. ໂດຍການເປັນປະທານຂອງ ທ່ານ ປອ.ດຣ ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ, ຄະນະພັກ, ຄະນະອຳນວຍການ, ຄະນະພະແນກ, ຄະນະຂະແໜງ, ສະມາຊິກພັກ, ພະນັກງານແພດໝໍ ແລະ ພະຍາບານ ກໍ່ໄດ້ເຂົ້າຮ່ວມ.
ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ໃຫ້ກຽດກ່າວເປີດພິທີກອງປະຊຸມຢ່າງເປັນທາງການ, ໃນກອງປະຊຸມທ່ານ ດຣ. ໄຄສີ ລາດຊະວົງ ຮອງຜູ້ອຳນວຍການໂຮງໝໍມະໂຫສົດ ຂື້ນຜ່ານບົດສະຫຼຸບການຈັດຕັ້ງເຄື່ອນໄຫວການບໍລິການສຸຂະພາບ 06 ເດືອນຕົ້ນປີ ແລະ ແຜນພັດທະນາ 06 ເດືອນທ້າຍປີ, ທ່ານ ດຣ. ບຸນໂຮມ ກັນທະວົງ ຮອງຜູ້ອຳນວຍການໂຮງໝໍມະໂຫສົດ ຜ່ານສະຫຼຸບການຈັດຕັ້ງເຄື່ອນໄຫວ ຂອງຄະນະພັກຮາກຖານ 6 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ;
ທ່ານ ດຣ. ສຸມ ສີສະເກດ ຫົວໜ້າພະແນກຈັດຕັ້ງ-ພະນັກງານ ຂຶ້ນຜ່ານຂໍ້ຕົກລົງ ວ່າດ້ວຍການອະນຸມັດ ໃຫ້ພະນັກງານ-ລັດຖະກອນ ພັກການຮັບອຸດໜູນບຳນ, ຂໍ້ຕົກລົງວ່າດ້ວຍການແຕ່ງຕັ້ງຫົວໜ້າ ແລະ ຮອງຫົວໜ້າພະແນກຂອງໂຮງໝໍ, ຂໍ້ຕົກລົງວ່າດ້ວຍການແຕ່ງຕັ້ງຫົວໜ້າ ແລະ ຮອງຫົວໜ້າຂະແໜງ ຂອງສູນຫົວໃຈ-ເສັ້ນເລືອດ ໂຮງໝໍມະໂຫສົດ ແລະ ມະຕິຕົກລົງວ່າດ້ວຍການມອບໃບຢັ້ງຢືນ ໜ່ວຍພັດປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2024. ຍັງມີພິທີມອບຂໍ້ຕົກລົງໃຫ້ແກ່ພະນັກງານ-ລັດຖະກອນ ທີ່ພັກການ-ຮັບອຸດໜູບຳນານ, ພະນັກງານທີ່ໄດ້ຮັບຕຳແໜ່ງໃໝ່ ແລະ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2024 ໃຫ້ແກ່ 10 ໜ່ວຍພັກຂອງ ໂຮງໝໍມະໂຫສົດ.
ຫຼັງຈາກນັ້ນ, ທ່ານປະທານ ກໍ່ໃຫ້ກຽດເຜີຍແຜ່-ເຊື່ອມຊືມ ເອກະສານສຳຄັນຂອງພັກ ຂອງຊາດ, ຍ້ອງຍໍຊົມເຊີຍ ພະນັກງານ-ລັດຖະກອນ ທີ່ໄດ້ຮັບອຸດໜູນບຳນານ ທີ່ເສຍສະຫຼະເຮັດໜ້າທີ່ແພດໝໍຕະຫຼອດໄລຍະຜ່ານມາ, ປະກອບສ່ວນອຸດທິເຫື່ອແຮງ ແລະ ສະຕິປັນຍາ ເຂົ້າໃນພາລະກິດທີ່ຖຶກມອບໝາຍ ກາຍເປັນແບບຢ່າງທີ່ດີ ໃຫ້ແກ່ພະນັກງານລຸ້ນຫຼັງ ຂອງໂຮງໝໍມະໂຫສົດ. ໃນນັ້ນ, ທ່ານປະທານ ຍັງໃຫ້ທິດຊີ້ນຳ,ໂອ້ລົມ ແລະ ຊົມເຊີຍ ບັນດາພະນັກງານ-ລັດຖະກອນ ທີ່ໄດ້ຮັບຕຳແໜງຫົວໜ້າພະແນກ, ຮອງຫົວໜ້າພະແນກ, ຫົວໜ້າຂະແໜງ ແລະ ຮອງຫົວໜ້າຂະແໜງທີ່ໄດຮັບຕຳແໜງໃໝ່.
ວັນທີ17 ກໍລະກົດ 2025 ໂຮງໝໍມະໂຫສົດ ໄດ້ຈັດພິທີສະເຫຼີມສະຫຼອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ70 ປີ (20 ກໍລະກົດ 1955 – 20 ກໍລະກົດ 2025) ໂດຍໃຫ້ກຽດການເປັນປະທານຂອງ ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ, ທ່ານ ນ. ໂພຄຳ ຊາວົງໄຊ ປະທານສະຫະພັນແມ່ຍິງໂຮງໝໍມະໂຫສົດໃນນັ້ນຍັງມີ ຄະນະພັກ, ຄະນະອຳນວຍການ, ຄະນະບໍລິຫານງານຊາວໜຸ່ມ, ຄະນະບໍລິຫານງານກຳມະບານ, ພະນັກງານອາວຸໂສບຳນານ, ພະນັກງານແພດໝໍ, ພະຍາບານ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມຢ່າງຝົດຟື້ນ.
ທ່ານ ປອ.ດຣ. ຊູຊາດ ວົງພະຈັນຜູ້ອຳນວຍການໂຮງໝໍມະໂຫສົດ ໄດ້ກ່າວເປີດພິທີ, ໃຫ້ຄຳເຫັນ, ຍ້ອງຍໍຊົມຊີຍສະຫະພັນແມ່ຍິງໂຮງໝໍມະໂຫສົດ ແລະ ໃຫ້ທິດຊີ້ນຳໃນການຈັດຕັ້ງປະຕິບັດວຽກງານຂອງສະຫະພັນແມ່ຍິງ. ທ່ານ ນ. ໂພຄຳ ຊາວົງໄຊ ປະທານສະຫະພັນແມ່ຍິງໂຮງໝໍມະໂຫສົດ ໄດ້ຜ່ານບົດສະຫຼຸບວຽກງານການຈັດຕັ້ງປະຕິບັດປະຈຳປີ2024 ແລະ ແຜນພັດທະນາ ປີ2025 ຂອງສະຫະພັນແມ່ຍິງ ໂຮງໝໍມະໂຫສົດ, ທ່ານ ນ. ໜໍ່ຄຳ ບຸດຕະວົງ ຮອງປະທານສະຫະພັນແມ່ຍິງ ໂຮງໝໍມະໂຫສົດ ໄດ້ເລົ່າມູນເຊື້ອ, ປະຫວັດຄວາມເປັນມາຂອງວັນສ້າງຕັ້ງສະຫະພັນແມ່ຍິງລາວ. ໃນນັ້ນ, ຍັງມີການມອບໃບຍ້ອງຍໍ ຂໍ້ແຂ່ງຂັນ 03 ດີ ໃຫ້ແກ່ຫົວໜ້າຈຸ ແລະ ສະມາຊິກສະຫະພັນແມ່ຍິງ ໂຮງໝໍມະໂຫສົດ, ຍັງໄດ້ຈັດກິດຈະກຳ ການກວດຄັດກອງມະເຮັງເຕົ້ານົມ ດ້ວຍເຄື່ອງ Ultrasound ແລະ ປະເມີນໂພຊະນາການ, ສິລະປະ, ຮ້ອງເພງ, ຫຼິ້ນເກມປະກອບຄຳ, ຕອບຄຳຖາມ ແລະ ເປີດຕະຫຼາດນັດຂາຍສິນຄ້າ ພາຍໃນໂຮງໝໍມະໂຫສົດ.
ໃນທຸກໆປີ ໂຮງໝໍມະໂຫສົດຈະມີການຈັດງານພິທີສະເຫຼີມສະຫຼອງ ປີລະ02 ຄັ້ງ ບໍ່ວ່າ ຈະເປັນວັນແມ່ຍິງສາກົນວັນທີ 8 ມີນາ ແລ ະວັນສ້າງຕັ້ງສະຫະພັນແມ່ຍິງລາວ ວັນທີ20 ກໍລະກົດ ເພື່ອເປັນການເຜີຍແຜ່ ເຊື່ອມຊືມປະຫວັດການກຳເນີດ, ການເຕີບໃຫຍ່, ການຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ, ໃຫ້ສະມາຊິກສະຫະພັນແມ່ຍິງແຕ່ລະພາກສ່ວນໄດ້ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງເພື່ອເປັນການປຸກລະດົມ, ຈິດສຳນຶກໃນການອານຸລັກຮັກສາ ແລະ ເສີມຂະຫຍາຍຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນດາເຜົ່າ ເພື່ອເພີ່ມທະວີຄວາມຮັບຜິດຊອບ ຂອງຄະນະ ແລະ ສະມາຊິກສະຫະພັນແມ່ຍິງ ໃນການຈັດຕັ້ງປະຕິບັດຄຳຂວັນ ແລະ ຂໍ້ແຂ່ງຂັນ 03 ດີຂອງສະຫະພັນແມ່ຍິງລາວ.
ພະແນກພະຍາດປອດ ແລະ ວັນນະໂລກ, ໂຮງໝໍມະໂຫສົດ ເປັນພະແນກໜຶ່ງ ທີ່ປິ່ນປົວພະຍາດລະບົບຫາຍໃຈ, ແລະ ມີການສ່ອງຫຼອດປອດ (Bronchoscopie) ດ້ວຍເຄື່ອງອຸປະກອນການແພດທີ່ທັນສະໄໝ ເພື່ອກວດເບິ່ງລະບົບທາງເດີນຫາຍໃຈ ໃນການບົ່ງມະຕິພະຍາດ ແລະ ປິ່ນປົວ. ການສ່ອງຫຼອດປອດ ແມ່ນຫັດຖະການທາງການແພດ ທີ່ມີຄວາມສ່ຽງຕຳ ທີ່ຊ່ວຍໃຫ້ທ່ານໝໍໄດ້ກວດເບິ່ງລະບົບທາງເດີນຫາຍໃຈ ແລະ ປອດຂອງຄົນເຈັບ, ພະຍາດທີ່ພົບເຫັນໃນການສ່ອງຫຼອດປອດ ສ່ວນຫຼາຍແມ່ນພົບພະຍາດມະເຮັງປອດ ແລະ ຫຼອດປອດ,ພະຍາດວັນນະໂລກ, ອັກເສບປອດ, ປອດຕິດເຊື້ອລາ, ວັດຖຸແປກປອມ ແລະ ອື່ນໆ.
ວັນທີ 09 ກໍລະກົດ 2025 ພະແນກພະຍາດປອດ ແລະ ວັນນະໂລກ ໄດ້ເຮັດຫັດຖະການ ການສ່ອງຫຼອດປອດ (Bronchoscopie) ຄົນເຈັບ ເພດຍິງ ອາຍຸ 71 ປີ ບ້ານໃຫຍ່, ເມືອງບໍ່ແຕນ, ແຂວງໄຊຍະບູລີ. ເພື່ອກວດເບິ່ງລະບົບທາງເດີນຫາຍໃຈຂອງປອດ ແລະ ເກັບຕົວຢ່າງ ໄປວິໃຈຫາພະຍາດເພື່ອບົ່ງມະຕິພະຍາດ ແລະ ປິ່ນປົວຕາມຫຼັກວິຊາການ. ການສ່ອງຫຼອດປອດ ແມ່ນນຳໃຊ້ເຄື່ອງອຸປະກອນການແພດທີ່ທັນສະໄໝ, ສ່ອງຜ່ານກ້ອງທີ່ມີຂະໜາດນ້ອຍ, ການສ່ອງຫຼອດປອດແມ່ນໃຊ້ເວລາ 20-40 ນາທີ, ການສ່ອງແມ່ນສ່ອງຜ່ານທາງຊ່ອງດັງຂອງຄົນເຈັບ, ຈະມີການພົ່ນມຶນສະເພາະທີ່ເພຶ່ອຫຼຸດຜ່ອນການເຈັບປວດຂອງຄົນເຈັບ ແລະ ເປັນທີ່ເພິ່ງພໍໃຈຂອງຜູ້ທີ່ມາໃຊ້ບໍລິການສຸຂະພາບ ຢູ່ໂຮງໝໍມະໂຫສົດ.
ວັນທີ 11 ກໍລະກົດ 2025 ທ່ານ ນ. ໃບຄຳ ຂັດທິຍະ ລັດຖະມົນຕີ ກະຊວງສາທາລະນະສຸກ ພ້ອມດ້ວຍຄະນະ ແລະ ທີມງານ ລົງຢ້ຽມຢາມ, ພົບປະໂອ້ລົມ ແລະ ເຮັດວຽກ ຢູ່ໂຮງໝໍມະໂຫສົດ ໂດຍການຮັບຕ້ອບຂອງຜູ້ອຳນວຍການ, ຄະນະອຳນວຍການ, ຄະນະພັກ, ຄະນະສາມອົງການຈັດຕັ້ງມະຫາຊົນ, ຄະນະພະແນກ, ຄະນະຂະແໜງ, ທ່ານໝໍ ແລະ ພະຍາບານ.
ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ພ້ອມດ້ວຍຄະນະ ໄດ້ລາຍງານປະຫວັດຄວາມເປັນມາ, ວຽກງານການບໍລິການສຸຂະພາບອັນພົ້ນເດັ່ນ ແລະ ສະພາບລວມຂອງໂຮງໝໍມະໂຫສົດ ໃນການຈັດຕັ້ງປະຕິບັດຜ່ານມາ.
ພິເສດແມ່ນ ທ່ານ ນ. ໃບຄຳ ຂັດທິຍະ ລັດຖະມົນຕີ
ກະຊວງສາທາລະນະສຸກ ໄດ້ມີຄຳເຫັນ, ຍ້ອງຍໍຊົມເຊີຍ ບັນດາແພດໝໍ, ພະຍາບານ ແລະ ໃຫ້ທິດຊີ້ນຳຕໍ່ກັບການຍົກສູງ ຢຶດໝັ້ນ ໃນຈັນຍາບັນ, ຈັນຍາທຳວິຊາຊີບຂອງຕົນ, ການຄຸ້ມຄອງການບໍລິຫານ, ວິຊາການ ແລະ ຄວາມຮັບຜິດຊອບໃນການປິ່ນປົວພະຍາດໃຫ້ແກ່ພໍ່ແມ່ປະຊາຊົນ ຂອງການບໍລິການຕາມນະໂຍບາຍ “ ຫ້າດີ ໜຶ່ງພໍໃຈ ” ພ້ອມກັນທ່ານ ລັດຖະມົນຕີກະຊວງສາທາລະນະສຸກ ກໍ່ໄດ້ຢ້ຽມຢາມໂຮງໝໍ ພາກສ່ວນທີ່ຍັງບໍ່ທັນສຳເລັດສົມບູນ ແລະ ໃຫ້ທິດຊີ້ນຳ ໃຫ້ໂຮງໝໍເຮັດບົດລາຍງານພ້ອມແຜນ ທີ່ຕ້ອງການປະກອບໃສ່ໃຫ້ສຳເລັດ ໃນພາກສ່ວນທີ່ຍັງບໍ່ສຳເລັດ, ຊຸກຍູ້ ແລະ ຕິດຕາມການບໍລິການສຸຂະພາບແຕ່ລະພະແນກພາຍໃນໂຮງໝໍມະໂຫສົດ.
ວັນທີ 20 ມິຖຸນາ 2025 ໂຮງໝໍມະໂຫສົດ ຈັດພິທີສະເຫຼີມສະຫຼອງ ວັນສາທາລະນະສຸກລາວ ຄົບຮອບ 60 ປີ ຂອງໂຮງໝໍມະໂຫສົດ (18 ມິຖຸນາ 1965 – 18 ມິຖຸນາ 2025) ໂດຍມີ ທ່ານ ປອ.ດຣ. ຊູຊາດ ວົງພະຈັນ
ຜູ້ອຳນວຍການໂຮງໝໍມະໂຫສົດ ພ້ອມດ້ວຍຄະນະອຳນວຍການ, ຄະນະພັກ, ຄະນະສາມອົງການຈັດຕັ້ງມະຫາຊົນ, ຄະນະພະແນກ, ພະນັກງານອາວຸໂສບຳນານ, ພະນັກງານແພດໝໍ, ພະຍາບານ ແລະ ບັນດາພາກສ່ວນທີ່ກ່ຽວຂ້ອງ ກໍ່ໄດ້ເຂົ້າຮ່ວມ.
ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງມໍມະໂຫສົດ ໄດ້ກ່າວວ່າ: ດັ່ງທີ່ຮູ້ກັນແລ້ວວ່າ ວັນສາທາລະນະສຸກລາວ ແມ່ນກົງກກັບວັນທີ 18 ມິຖຸນາ ຂອງທຸກໆປີ ເຊິ່ງແມ່ນວັນທີ່ມີຄວາມໝາຍທາງປະຫວັດສາດ ໄດ້ຖຶກກຳນົດຂຶ້ນ
ເພື່ອເປັນການລະນຶກເຖິງຜົນງານ ແລະ ຄຸນງາມຄວາມດີຂອງແພດລາວ ໃນສະໄໝຕໍ່ສູ້ກູ້ຊາດ ກໍຄືສະໄໝປົກປັກຮັກສາ ສ້າງສາພັດທະນາປະເທດຊາດ ເພື່ອປຸກລະດົມມວນຊົນໃຫ້ເຫັນຄວາມສຳຄັນ, ເຂົ້າໃຈ ແລະ ເປັນເຈົ້າການໃນການສົ່ງເສີມການບໍລິການຮັກສາສຸຂະພາບ ຂອງຄອບຄົວ ແລະ ສັງຄົມ ເພື່ອຈາລຶກບຸນຄຸນຂອງແພດໝໍ ແລະ ພະນັກງານສາທາລະນະສຸກລາວ
ທີ່ເສຍສະຫຼະອຸທິສະຕິປັນຍາ ແລະ ເຫືອແຮງໃນການປະຕິບັດໜ້າທີ່ໃນແຕ່ລະໄລຍະ
ພິທີສະເຫຼີມສະຫຼອງ ວັນສາທາລະນະສຸກລາວ ໃນແຕ່ລະປີ ໂຮງໝໍມະໂຫສົດ ແມ່ນໄດ້ມີການເຕົ້າໂຮມການຈັດຕັ້ງພິທີສະເຫຼີມຫຼອງ ຂອງວັນດັ່ງກ່າວໄດ້ຢ່າງຟົດຟື້ນ ເຊັ່ນ: ມີການຈັດກິດຈະກຳແຂ່ງຂັນກິລາ, ສິລະປະວັນນະຄະດີ, ແລະ ແຂ່ງຂັນບົດຄົ້ນຄ້ວາວິທະຍາສາດ ທາງດ້ານວິຊາການອັນພົ້ນເດັ່ນຂອງແຕ່ລະພະແນກ ຂອງໂຮງໝໍມະໂຫສົດ.
