Category: ຂ່າວສານ

ພິທີໄວ້ອາໄລ ແລະ ລະນຶກເຖິງ​ຄຸນ​ງາມຄວາມດີຂອງ ທ່ານ Professor Sir Nicholas John White

Posted on by Mahosot_H Admin

ວັນທີ 06 ກຸມພາ 2026, ທີ່ໂຮງໝໍມະໂຫສົດ ໄດ້ມີການຈັດພິທີໄວ້ອາໄລ ແລະ ລະນຶກເຖິງຄຸນງາມຄວາມດີຂອງ ທ່ານ Professor Sir Nicholas John White ອະດິດປະທານໜ່ວຍງານຄົ້ນຄ້ວາ ອາຊີຕາເວັນອອກສຽງໃຕ້ຂອງ Wellcome Trust. ເຊິ່ງມີພາກສ່ວນຕ່າງໆເຂົ້າຮ່ວມເຊັ່ນ: ຜູ້ອຳນວຍການໂຮງໝໍມະໂຫສົດ ແລະ ຄະນະອຳນວຍການ, ອະດິດລັດຖະມົນຕີກະຊວງສາທາລະນະສຸກ, ອະທິການບໍດີ ວິທະຍາໄລວິທະຍາສາດສຸຂະພາບ, ຫົວໜ້າໂຄງການLOMWRU, ບັນດາຊ່ຽວຊານ, ທ່ານໝໍ, ພະຍາບານ ແລະ ວິຊາການຂອງໂຮງໝໍມະໂຫສົດກໍ່ໄດ້ເຂົ້າຮ່ວມ.

ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ພ້ອມດ້ວຍຄະນະ ສະແດງຄວາມເສຍໃຈຢ່າງສຸດຊຶ້ງມາຍັງຄອບຄົວ, ເພື່ອນຮ່ວມງານ ແລະ ວົງການແພດສາກົນ ຕໍ່ກັບການຈາກໄປຂອງ ທ່ານ Professor Sir Nicholas John White ນັກວິຊາການທີ່ຊົງຄຸນຄ່າ, ເຊິ່ງທ່ານໄດ້ອຸທິດກຳລັງກາຍກຳລັງໃຈ ແລະ ສະຕິປັນຍາເພື່ອພັດທະນາກວຽກງານດ້ານວິຊາການ, ຖອດຖອນຄວາມຮູ້, ປະສົບການ, ຍົກລະດັບຄວາມຮູ້ຄວາມສາມາດໃຫ້ແກ່ແພດໝໍ, ນັກວິໄຈໃຫ້ມີຄວາມສາມາດລະດັບສາກົນ ແລະ ຍັງໄດ້ມີການສ້າງຕັ້ງຫ້ອງວິເຄາະຢູ່ພະແນກຈຸລິນຊີວິທະຍາ, ໂຮງໝໍມະໂຫສົດ ໂດຍການຮ່ວມມືລະຫວ່າງ ໂຮງໝໍມະໂຫສົດ, ມະຫາວິທະຍາໄລອ໋ອກຟອດ ແລະ ແວວຄຳຕຼັສ (LOMWRU).

ໃນນັ້ນ, ທ່ານ ປອ.ດຣ. ມາຍຟອງ ມາຍຊາຍ ອະທິການບໍດີ ວິທະຍາໄລວິທະຍາສາດສຸຂະພາບ, ທ່ານ ຮສ.ດຣ. ບຸນກອງ ສີຫາວົງ ອະດິດລັດລັດຖະມົນຕີກະຊວງສາທາລະນະສຸກ ແລະ ທ່ານ Professor Elizabeth Ashley ຜູ້ອຳນວຍການໂຄງການ LOMWRU ກໍ່ໄດ້ຮ່ວມກ່າວໄວ້ອາໄລ ແລະ ລະນຶກເຖິງຄຸນງາມຄວາມດີ ຂອງ ທ່ານ Professor Sir Nicholas John White ທີ່ມີຜົນງານອັນໃຫຍ່ຫຼວງຕໍ່ກັບວົງການສາທາລະນະສຸກ, ສປປ ລາວ.ທ່ານຍັງເປັນຜູ້ບຸກເບີກການສຶກສາ, ຄົ້ນຄວ້າວິທີການປິ່ນປົວພະຍາດ ແລະໄດ້ຊ່ວຍຊິວິດຄົນຫຼາຍລ້ານຄົນໃນທົ່ວໂລກ.

ກິດຈະກຳເພື່ອກການກຸສົນຢູ່ ສປປ ລາວ ພາຍໃຕ້ຫົວຂໍ້: “ເສັ້ນທາງສາຍໄໝແຫ່ງສຸຂະພາບທາງອາກາດ” ຂອງໂຮງໝໍຫູ ຕາ ດັງ ຄໍ ວິທະຍາໄລຟູຕ້ານ ນະຄອນຊຽງໄຮ ສປ ຈີນ ເທິງເຮືອບິນ C909

Posted on by Mahosot_H Admin
https://mahosothospital.com/wp-content/uploads/2026/02/WhatsApp-Video-2026-02-14-at-18.03.23.mp4

ພິທີສະຫຼຸບ ການຈັດຕັ້ງປະຕິບັດວຽກງານບໍລິການສຸຂະພາບ ປະຈຳປີ 2025 ແລະ ທິດທາງແຜນການ ປີ 2026 ຂອງໂຮງໝໍມະໂຫສົດ.

Posted on by Mahosot_H Admin

ວັນທີ 15 ມັງກອນ 2026, ໂຮງໝໍມະໂຫສົດ ໄດ້ຈັດພິທີສະຫຼຸບ ການຈັດຕັ້ງປະຕິບັດວຽກງານບໍລິການສຸຂະພາບ ປະຈຳປີ 2025 ແລະ ທິດທາງແຜນການ ປີ 2026 ຂອງໂຮງໝໍມະໂຫສົດ, ໃຫ້ກຽດການເປັນປະທານໂດຍ ທ່ານ ນ. ໃບຄຳ ຂັດທິຍະ ລັດຖະມົນຕີກະຊວງສາທາລະນະສຸກ ເຊີ່ງມີຜູ້ເຂົ້າຮ່ວມເຊັ່ນ: ຄະນະພັກ, ຄະນະອຳນວຍການ, ອະດິດການນຳກະຊວງສາທາລະນະສຸກ, ພະນັກງານອາວຸໂສບຳນານ, ຄະນະສູນ, ຄະນະກົມ, ໂຮງໝໍສູນກາງ, ຄະນະພະແນກ, ຄະນະຂະແໜງ, ພະນັກງານແພດໝໍ ແລະ ພາກສ່ວນກ່ຽວຂ້ອງ ກໍ່ເຂົ້າຮ່ວມຢ່າງພ້ອມພຽງ ຈຳນວນ 227 ທ່ານ (ຍິງ 168 ທ່ານ).

          ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານບໍລິການສຸຂະພາບ ປະຈຳປີ 2025 ແລະ ບົດລາຍງານກ່ຽວກັບການກໍ່ສ້າງຕຶກໃໝ່ (ໄລຍະ 01 ແລະ 02), ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ ໄດ້ຜ່ານແຜນທິດທາງ ປີ 2026, ທ່ານ ດຣ. ບຸນໂຮມ ກັນທະວົງ ຮອງຜູ້ອຳນວຍການໂຮງໝໍມະໂຫສົດ ໄດ້ຜ່ານຂໍ້ແຂ່ງຂັນຮັກຊາດ, ພັດທະນາ ປະຈຳປີ 2025 , ແຜນພັດທະນາການບໍລິການສຸຂະພາບ ປີ 2026 ຂອງໂຮງໝໍມະໂຫສົດ ແລະ ທ່ານ ດຣ. ສຸມ ສີສະເກດ ຫົວໜ້າພະແນກຈັດຕັ້ງ-ພະນັກງານ ໄດ້ຜ່ານຂໍ້ຕົກລົງການຍ້ອງຍໍພະນັກງານດີເດັ່ນ ປີ 2025 ຂອງໂຮງໝໍມະໂຫສົດ.

          ພິທີດັ່ງກ່າວ, ທ່ານ ນ. ໃບຄຳ ຂັດທິຍະ ລັດຖະມົນຕີກະຊວງສາທາລະນະສຸກ ໄດ້ກ່າວມີຄຳເຫັນ, ໃຫ້ທິດຊີ້ນຳ ແລະ ຍ້ອງຍໍຊົມເຊີຍຜົນສຳເລັດຂອງການເຄື່ອນໄຫວວຽກງານບໍລິການສຸຂະພາບ ປະຈຳປີ 2025 ແລະ ແຜນພັດທະນາ ປີ 2026, ໃນການຍົກສູງການບໍລິການສຸຂະພາບ, ການປະຕິບັດນະໂຍບາຍ 5 ດີ 1 ພໍໃຈ , ການພັດທະນາບຸກຄະລາກອນໃຫ້ຫຼາຍສາຂາວິຊາການ ພ້ອມຍົກສູງດ້ານຈັນຍາບັນ-ຈັນຍາທຳ ສ້າງຄວາມເຊື່ອໝັ້ນຂອງສັງຄົມເພີ່ມຂຶ້ນ, ຈັດຕັ້ງຜັນຂະຫຍາຍຜົນຂອງກອງປະຊຸມຄັ້ງນີ້ກໍ່ຄື: ແຜນພັດທະນາວຽກງານບໍລິການປິ່ນປົວ ຂອງໂຮງໝໍມະໂຫສົດ ໃຫ້ມີປະສິດທິພາບ ແລະ ປະສິດທິຜົນສູງທີ່ສຸດ.

ພິທີປະດັບຫຼຽນກາລະນຶກ 50 ປີ ວັນສະຖາປະນາ ສາທາລະນະວັດ ປະຊາທິປະໄຕ ປະຊາຊົນລາວ (ວັນທີ 02 ທັນວາ 1975 – ວັນທີ 02 ທັນວາ 2025) ໃຫ້ແກ່ພະນັກງານ-ລັດຖະອນປະຈຳການ ແລະ ພະນັກງານບຳນານ ຂອງໂຮງໝໍມະໂຫສົດ.

Posted on by Mahosot_H Admin

ວັນທີ 13 ມັງກອນ 2026, ທີ່ຜານມາ ໂຮງໝໍມະໂຫສົດ ໄດ້ຈັດພິທີປະດັບຫຼຽນກາລະນຶກ 50 ປີ ວັນສະຖາປະນາ ສາທາລະນະວັດ ປະຊາທິປະໄຕ ປະຊາຊົນລາວ (ວັນທີ 02 ທັນວາ 1975 - ວັນທີ 02 ທັນວາ 2025) ໃຫ້ແກ່ພະນັກງານ-ລັດຖະກອນປະຈຳການ ແລະ ພະນັກງານບຳນານ. ໂດຍການເປັນປະທານຂອງ ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ, ເຊິ່ງມີຜູ້ເຂົ້າຮ່ວມເຊັ່ນ: ຄະນະພັກ, ຄະນະອຳນວຍການ, ຄະນະພະແນກ, ພະນັກງານອາວຸໂສບຳນານ, ຂະແໜງ ແລະ ພະນັກງານແພດໝໍ ກໍ່ເຂົ້າຮ່ວມຢ່າງພ້ອມພຽງ ລວມທັງໝົດ 228 ທ່ານ.

ພິທີປະດັບຫຼຽນກາລະນຶກ 50 ປີ ໃຫ້ກຽດການປະດັບຫຼຽນໂດຍ ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການໂຮງໝໍມະໂຫສົດ ແລະ ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ, ເຊິ່ງການປະດັບຫຼຽນກາລະນຶກ 50 ປີ ໃຫ້ແກ່ພະນັກງານ-ລັດຖະກອນປະຈຳການ ແລະ ພະນັກງານບຳນານ ຂອງໂຮງໝໍມະໂຫສົດ ເຊັ່ນ: ຄະນະພັກຮາກຖານ, ຄະນະອຳນວຍການ, ຄະນະພະນັກແນກ, ຄະນະຂະແໜງ, ພະນັກງານອາວຸໂສບຳນານ ແລະ ພະນັກງານແພດໝໍ ທັງໝົດ 571 ທ່ານ (ຍິງ 345 ທ່ານ). ໃນນັ້ນ, ພະນັກງານ-ລັດຖະກອນປະຈຳການ 310 ທ່ານ ແລະ ພະນັກງານບຳນານ 261 ທ່ານ. ທັງນີ້ເພື່ອສະແດງຄວາມຮູ້ບຸນຄຸນຕໍ່ການນຳ, ອະດິດການນຳ ແລະ ພະນັກງານໃນປັດຈຸບັນ ທີ່ມີຜົນງານ, ຄຸນງາມຄວາມດີ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະຜ່ານ.

ກວດສຸຂະພາບປະຈຳປີນອກສະຖານທີ່ໃຫ້ແກ່ ລັດວິສາຫະກິດ ໄຟຟ້າລາວ

Posted on by Mahosot_H Admin

ວັນທີ 22-24 ທັນວາ 2025 ໂຮງໝໍມະໂຫສົດ ໄດ້ຮັບການບໍລິການກວດສຸຂະພາບປະຈຳປີ ນອກສະຖານທີ່ໃຫ້ແກ່ ລັດວິສາຫະກິດ ໄຟຟ້າລາວ ຈຳນວນ 759 ທ່ານ. ເຊິ່ງການກວດສຸຂະພາບຄັ້ງນີ້ ແມ່ນກວດສຸຂະພາບທົ່ວໄປ,  ກວດກາເພີ່ມເຕີມ (ກວດເລືອດ), ເອໂກ້ຜົ້ງທ້ອງ (Echography), ເອັກສະເລປອດ (X-ray),  ແທກຄື້ນຫົວໃຈ ແລະ ວັດແທກການໄດ້ຍິນຂອງຫູ. ພາຍຫຼັງ ທີ່ໄດ້ກວດກາທາງດ້ານຮ່າງກາຍ ແລະ ຜົນກວດເລືອດອອກແລ້ວ ແມ່ນຄະນະຮັບຜິດຊອບ ໄດ້ເຮັດໃບຢັ້ງຢືນສຸຂະພາບ ແລະ ສະຫຼຸບຜົນການກວດຕ່າງໆຂອງພະນັກງານ ໃຫ້ແກ່ພາກສ່ວນທີ່ກ່ຽວຂ້ອງ.

ໃນປັດຈຸບັນ, ໂຮງມໍມະໂຫສົດ ແມ່ນມີທີງານການບໍລິການສຸຂະພາບປະຈຳປີ ໃຫ້ແກ່ພາກສ່ວນຕ່າງໆພາຍໃນ ແລະ ນອກສະຖານທີ່ ເຊັ່ນ: ໂຮງງານ, ບໍລິສັດ, ຮ້ານ ແລະ ອື່ນໆ. ໃນນັ້ນ, ໂຮງໝໍແມ່ນມີຊ່ຽວຊານສະເພາະທາງ, ອຸປະກອນການແພດ ທີ່ທັນສະໄໝ ແລະ ສິ່ງອຳນວຍຄວາມສະດວກຕ່າງໆໃນການເຄື່ອນໄຫວກິດຈະກຳ. ເພື່ອເຮັດໃຫ້ເກີດຄວາມສະດວກ, ວ່ອງໄວ, ຮັບປະກັນຄຸນນະພາບການບໍລິການ ແລະ ເຮັດໃຫ້ຜູ້ທີ່ມາຮັບບໍລິການເກີດຄວາມເພິ່ງພໍໃຈ.

ກິດຈະກຳກວດສຸຂະພາບ ແລະ ກວດຄ່ານ້ຳຕານໃນເລືອດ ໂດຍບໍ່ເສຍຄ່າ (ຟຣີ) ໃຫ້ແກ່ພໍ່ແມ່ປະຊາຊົນ ເພື່ອສະເຫຼີມສະຫຼອງວັນເບົາຫວານໂລກ.

Posted on by Mahosot_H Admin

ວັນທີ 21 ພະຈິກ 2025 ໂຮງໝໍມະໂຫສົດ, ໄດ້ຈັດກິດຈະກຳກວດສຸຂະພາບ ແລະ ກວດຄ່ານ້ຳຕານໃນເລືອດ ໂດຍບໍ່ເສຍຄ່າ (ຟຣີ) ໃຫ້ແກ່ພໍ່ແມ່ປະຊາຊົນ ເພື່ອສະເຫຼີມສະຫຼອງວັນເບົາຫວານໂລກ ໃນວັນທີ 14 ພະຈິກ 2025 ໃຫ້ກຽດການເປີດກິດຈະກຳຄັ້ງນີ້ ໂດຍ ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ ແລະມີພາກສ່ວນຕ່າງໆເຂົ້າຮ່ວມເຊັ່ນ: ທ່ານໝໍ, ພະບານ, ພາກສ່ວນທີ່ກ່ຽວຂ້ອງ ແລະ ພໍ່ແມ່ປະຊາຊົນກໍ່ໄດ້ເຂົ້າຮ່ວມ.

ກິດຈະກຳມີການກວດສຸຂະພາບທົ່ວໄປ, ກວດຄວາມດັນເລືອດ, ກວດຄ່ານ້ຳຕານໃນເລືອດ, ກວດຄ່າຄິດໄລ່ການດຸ່ນດ່ຽງຄວາມສົມບູນຂອງຮ່າງກາຍ (BMI) ແລະ ການແນະນຳວິທີນຳໃຊ້ຢາປິ່ນປົວພະຍາດເບົາຫວານ. ເພື່ອໃຫ້ປະຊາຊົນ ແລະ ຜູ້ມາໃຊ້ບໍລິການໄດ້ເຂົ້າເຖິງຂໍ້ມູນກ່ຽວກັບພະຍາດເບົາຫວານໃນເດັກນ້ອຍ ແລະ ຜູ້ໃຫຍ່ ໃຫ້ຮູ້ຂໍ້ມູນໃນການເບິ່ງແຍງສຸຂະພາບຄົນເຈັບ, ເພື່ອປ້ອງກັນ, ຕິດຕາມ ແລະ ແລະ ຄວບຄຸມການຂະຫຍາຍຂອງພະຍາດ. ໃນວັນວັນທີ 14 ພະຈິກ ຂອງທຸກໆປີ ແມ່ນວັນທີ່ມີຄວາມໝາຍສຳຄັນເພື່ອລະນຶກເຖິງ ຄົນເຈັບພະຍາດເບົາຫວານໃນທົ່ວໂລກກໍ່ຄືຄົນເຈັບເບົາຫວານໃນ ສປປ ລາວ.

ພິທີເຊັນສັນຍາ ບົດບັນທຶກການຮ່ວມມື (MOU) ທາງດ້ານວິຊາການ ລະຫວ່າງ ໂຮງໝໍມະໂຫສົດ, ກະຊວງສາທາລະນະສຸກ, ສປປ ລາວ ແລະ ມະຫາວິທະຍາໄລ ແພດສາດມິດຕະພາບຫວຽດນາມ-ເຢຍລະມັນ ຮ່ວາງກຽນ, ແຂວງ ຮ່າໂນ່ຍ, ສສ ຫວຽດນາມ.

Posted on by Mahosot_H Admin

ວັນທີ 06 ທັນວາ 2025 ໂຮງໝໍມະໂຫສົດ ໄດ້ຈັດພິທີ ເຊັນສັນຍາບົດບັນທຶກການຮ່ວມມື (MOU) ທາງດ້ານວິຊາການ ລະຫວ່າງ ໂຮງໝໍມະໂຫສົດ, ກະຊວງສາທາລະນະສຸກ, ສປປ ລາວ ແລະ ມະຫາວິທະຍາໄລ  ແພດສາດມິດຕະພາບຫວຽດນາມ-ເຢຍລະມັນ, ຮ່ວາງກຽນ, ແຂວງ ຮ່າໂນ່ຍ, ສສ ຫວຽດນາມ.  ເຊິ່ງມີຜູ້ຕາງໜ້າເຂົ້າຮ່ວມເຊັ່ນ: ຄະນະອຳນວຍການ ໂຮງໝໍມະໂຫສົດ, ຄະນະອຳນວຍການໂຮງໝໍມິດຕະພາບຫວຽດນາມ-ເຢຍລະມັນ, ຄະນະພະແນກ, ຄະນະຂະແໜງ, ທີມງານມະຫາວິທະຍາໄລ  ແພດສາດມິດຕະພາບຫວຽດນາມ-ເຢຍລະມັນ ສສ ຫວຽດນາມ ແລະ ວິຊາການທີ່ກ່ຽວຂ້ອງກໍ່ໄດ້ເຂົ້າຮ່ວມ.

          ພິທີເຊັນສັນຍາບົດບັນທຶກການຮ່ວມມື ຄັ້ງນີ້,  ໄດ້ລົງນາມໂດຍ ທ່ານ ປອ.ດຣ. ຊູຊາດ ວົງພະຈັນ ຜູ້ອຳນວຍການ ໂຮງໝໍມະໂຫສົດ ແລະ ທ່ານ ເຍື່ອງ ວັນ ຮຸ່ງ ຜູ້ອຳນວຍການໂຮງໝໍມິດຕະພາບຫວຽດນາມ-ເຢຍລະມັນ. ທັງ 02 ຝ່າຍ ຕົກລົງເຫັນດີຊ່ວຍເຫຼືອກໍ່ສ້າງດ້ານການແພດ, ການຮ່ວມມືທາງດ້ານວິຊາການ, ຕອບສະໜອງການບໍລິການດ້ານດານແພດທີ່ມີຄຸນນະພາບສູງ, ຊຸກຍູ້ການຮ່ວມມືດ້ານການແພດເພື່ອເພີ່ມທະວີສາຍພົວພັນ  ແລະ ຍົກສູງຄຸນນະພາບການບໍລິການທາງດ້ານການແພດ, ເພື່ອເພີ່ມຄວາມສາມັກຄີ ແລະ ສ້າງສາຍພົວພັນ ລະຫວ່າງ ສປປ ລາວ ແລະ ສສ ຫວຽດງນາມ.

ທ່ານ Rene’ LAUER Director of Bilateral Cooperation, Directorate of Coopertion and Humanitarian Action ກະຊວງການຕ່າງເທດລຸກຊຳບວກ ພ້ອມດ້ວຍຄະນະ ຢ້ຽມຢາມ ສູນຫົວໃຈ-ເສັ້ນເລືອດ, ໂຮງໝໍມະໂຫສົດ.

Posted on by Mahosot_H Admin

ວັນທີ 08 ທັນວາ 2025 ໂຮງໝໍມະໂຫສົດ ໄດ້ຕ້ອນຮັບ Mr. René LAUER Director of Bilateral Cooperation, Directorate of Coopertion and Humanitarian Action ກະຊວງການຕ່າງເທດລຸກຊຳບວກ ພ້ອມດ້ວຍຄະນະ ແລະ Mr. Thomas LAMMAR Chargé d’affaires a. i., Embassy in Laos, Regional Coopereation Office ພ້ອມດ້ວຍຄະນະ ມາຢ້ຽມຢາມ ສູນຫົວໃຈ-ເສັ້ນເລືອດ, ໂຮງໝໍມະໂຫສົດ. ຕ້ອນຮັບໂດຍ ທ່ານ ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ, ທ່ານ Dr. Richard Philippe Schneider ຫົວໜ້າອົງການ ADS ປະເທດລຸກຊຳບວກ ພ້ອມດ້ວຍທີມງານ, ທ່ານ ດຣ. ຄຳແພງ ແກ້ວມະນີວົງ ຫົວໜ້າສູນຫົວໃຈ-ເສັ້ນເລືອດ, ຄະນະສູນ, ຄະນະພະແນກ, ຂະແໜງ ແລະ ພາກສ່ວນທີ່ກ່ຽວຂ້ອງ.

ທ່ານ Dr. Richard Philippe Schneider ຫົວໜ້າອົງການ ADS ປະເທດລຸກຊຳບວກ ໄດ້ລາຍງານການຈັດຕັ້ງປະຕິບັດໃນໄລຍະຜ່ານມາຂອງການຮ່ວມມື, ການລົງມາຢ້ຽມຢາມຄັ້ງນີ້ໄດ້ມີການປຶກສາຫາລືການຮ່ວມມື ທາງດ້ານວິຊາການກວດບົ່ງມະຕິ, ປິ່ນປົວພະຍາດຫົວໃຈ-ເສັ້ນເລືອດ, ປິ່ນປົວກ້ວຍການຜ່າຕັດຫົວໃຈ, ແລະ ແຜນການຮ່ວມມືໃນຕໍ່ໜ້າ ຂອງໂຮງໝໍມະໂຫສົດ, ກະຊວງສາທາລະນະສຸກ ສປປ ລາວ ແລະ ອົງການ ADS ປະເທດລຸກຊຳບວກ.

ກິດຈະກຳການຜ່າຕັດສົບແຫວ່ງ-ເພດານໂຫວ່ ໂດຍການຮ່ວມມືລະຫວ່າງ ໂຮງໝໍມະໂຫສົດ, ມູນນິທິ ພັດທະນາລ້ານຊ້າງ-ແມ່ຂອງ ແລະ ມູນນິທິ ຮອຍຍີ້ມແມ່ ສປ ຈີນ.

Posted on by Mahosot_H Admin

ວັນທີ 20 ພະຈິກ 2025 ໂຮງໝໍມະໂຫສົດ, ຮ່ວມມືກັບ ມູນນິທິ ພັດທະນາລ້ານຊ້າງ-ແມ່ຂອງ ແລະ ມູນນິທິ ຮອຍຍີ້ມແມ່ ສປ ຈີນ (China Women’s Development Foundation), ໄດ້ຈັດພິທີເປີດກິດຈະກຳການຜ່າຕັດສົບແຫວ່ງ-ເພດານໂຫວ່ ຫົວຂໍ້: ‘’ຮອຍຍິ້ມແມ່ ຄວາມຮັກໃນປະເທດລາວ ປີ 2025’’  ໃຫ້ກຽດການເປັນປະທານໂດຍ ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ, ທ່ານ ນ. ພູຄຳ ວົງວິຈິດ ປະທານມູນນິທິ ພັດທະນາລ້ານຊ້າງ-ແມ່ຂອງ ແລະ ທ່ານ Han Kai Founder of smile for Mother Project, the sixth National Moral Model ສປ ຈີນ. ເຊິ່ງໃຫ້ກຽດເຂົ້າຮ່ວມໂດຍ ທ່ານ ປ້ານາລີ ສີສຸລິດ ພັນລະຍາ ທ່ານປະທານປະເທດແຫ່ງ ສປປ ລາວ ແລະ ຕ່າງໜ້າຈາກພາກສ່ວນຕ່າງໆເຂົ້າຮ່ວມເຊັ່ນ: ຄະນະອຳນວຍການ, ກົມປິ່ນປົວ ແລະ ຟື້ນໜ້າທີ່ການ, ກະຊວງການຕ່າງປະເທດ, ທີມງານມູນນິທິຮອຍຍີ້ມແມ່, ພ້ອມດ້ວຍແພດໝໍ, ວິຊາການ ທີ່ກ່ຽວຂ້ອງ ແລະ ພໍ່ແມ່ປະຊາຊົນກໍ່ໄດ້ເຂົ້າຮ່ວມ.

ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ ໄດ້ກ່າວເປີດພິທີ ແລະ ມີຄຳເຫັນ:  ການຈັດຕັ້ງປະຕິບັດ ວຽກງານການຜ່າຕັດສົບແຫວ່ງ-ເພດານໂຫວ່, ໂຮງໝໍມະໂຫສົດ ແມ່ນເລີມຈັດຕັ້ງປະຕິບັດແຕ່ປີ 2005 ເປັນຕົ້ນມາ ອາການສົບແຫວ່ງ-ເພດານໂຫວ່ ເປັນຄວາມຜິດປົກກະຕິແຕ່ກຳເນີດ ທີ່ສົ່ງຜົນກະທົບໂດຍກົງຕໍ່ການກິນ, ການເວົ້າ, ການເຕີບໃຫຍ່ ແລະ ສະພາບຈິດໃຈ, ໂດຍສະເພາະເດັກນ້ອຍ ເຂົາເຈົ້າແມ່ນຕ້ອງໄດ້ຮັບການຊ່ວຍເຫຼືອທາງການແພດຢ່າງທັນເວລາ ແລະ ມີມາດຕະຖານຂອງການປິ່ນປົວ. ການຜ່າຕັດຄັ້ງນີ້ມີຄົນເຈັບມາລົງທະບຽນ 54 ກໍລະນີ ແລະ ໄດ້ຮັບການຜ່າຕັດ 40 ກໍລະນີ.

ກິດຈະກຳຄັ້ງນີ້, ແມ່ນການຜ່າຕັດສົບແຫວ່ງ-ເພດານໂຫວ່ ໃຫ້ແກ່ເດັກນ້ອຍຂອບເຂດທົ່ວປະເທດ ແລະ ເປັນການມອບຮອຍຍີ້ມໃໝ່, ຊິວິດໃໝ່, ຄວາມຫັວງ  ແລະ ຟື້ນຟູຮອຍຍີ້ມໃຫ້ແກ່ດັກນ້ອຍ.

ໃນນັ້ນ, ໂຮງໝໍມະໂຫສົດ ຂໍສະແດງຄວາມຮູ້ບຸນຄຸນ ແລະ ຂອບໃຈມາຍັງທ່ານປະທານມູນິທິ ພັດທະນາລ້ານຊ້າງ-ແມ່ຂອງ ແລະ ທ່ານປະທານມູນນິທິ ຮອຍຍີ້ມແມ່ ສປ ຈີນ ທີ່ສະໜັບສະໜູນ ທາງດ້ານອຸປະກອນແພດ, ສ້າງຄວາມເຂັ້ມແຂງດ້ານວິຊາການໃຫ້ແກ່ບຸກຄະລາກອນແພດໝໍ ຂອງໂຮງໝໍມະໂຫສົດໃຫ້ດີຂຶ້ນເທື່ອລະກ້າວ.

ງານສະເຫຼີມສະຫຼອງ ຄົບຮອບ 25 ປີ ຂອງໂຄງການຮ່ວມມືຄົ້ນຄ້ວາດ້ານພະຍາດເຂດຮ້ອນ ລະຫວ່າງ ໂຮງໝໍມະໂຫສົດ, ມະຫາວິທະຍາໄລອ໋ອກຟອດ ແລະ ແວວຄຳຕຼັສ (LOMWRU).

Posted on by Mahosot_H Admin

ວັນທີ 19 ພະຈິກ 2025 ທີ່ໂຮງໝໍມະໂຫສົດ, ໄດ້ຈັດງານສະເຫຼີມສະຫຼອງ ຄົບຮອບ 25 ປີ ຂອງໂຄງການຮ່ວມມືຄົ້ນຄ້ວາດ້ານພະຍາດເຂດຮ້ອນ ລະຫວ່າງ ໂຮງໝໍມະໂຫສົດ, ມະຫາວິທະຍາໄລອ໋ອກຟອດ ແລະ ແວວຄຳຕຼັສ (LOMWRU) ໂດຍໃຫ້ກຽດເປັນປະທານໂດຍ ທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ເຊິ່ງມີຜູ້ເຂົ້າຮ່ວມເຊັ່ນ: ຄະນະອຳນວຍການໂຮງໝໍມະໂຫສົດ, ການໂຄງການ LOMWRU, ມະຫາວິທະຍາໄລອ໋ອກຝອດ, ແວວຄຳຕຼັສ, ໂຄງການ MORU, ມະຫາວິທະຍາໄລມະຫິດົນ, ມະຫາວິທະຍາໄລວິທະຍາສາດສຸຂະພາບ, ໂຮງໝໍສູນກາງ, ໂຮງໝໍແຂວງ, ຄະນະພະແນກ, ຄະນະຂະແໜງ, ຄະນະກົມ, ຄະນະສູນອ້ອມຂ້າງກະຊວງ, ຕົວແທນຈາກສະຖານທູດອັງກິດ, ຝລັ່ງ ແລະ ສະຫະລັດອາເມລິກາ, ພ້ອມດ້ວຍອົງການຈັດຕັ້ງສາກົນຕ່າງໆ ແລະ ພາກສ່ວນທີ່ກ່ຽວຂ້ອງກໍ່ໄດ້ເຂົ້າຮ່ວມ. ງານຄັ້ງນີ້ໄດ້ມີຜູ້ເຂົ້າຮ່ວມສະເຫລີມສະຫລອງ ຈໍານວນ 200 ທ່ານ.

ທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ກ່າວມີຄຳເຫັນ, ຍ້ອງຍໍຊົມເຊີຍການຈັດຕັ້ງປະຕິບັດຂອງໂຄງການຮ່ວມມືຄົ້ນຄ້ວາດ້ານພະຍາດເຂດຮ້ອນ ແລະ ກ່າວເປີດງານສະເຫຼີມສະຫຼອງຢ່າງເປັນທາງການ, ພາຍໃນງານຍັງມີພາກສ່ວນຕ່າງໆກ່າວມີຄຳເຫັນເຊັນ: ທ່ານ ດຣ. ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ,  ທ່ານProfessor Elizabeth Ashley ຜູ້ອຳນວຍການໂຄງການ LOMWRU, ທ່ານ Assco. Professor Weerapong Phumratanaprapin ອະທິການບໍດີຄະນະພາກວິຊາການແພດເຂດຮ້ອນ ມະຫາວິທະຍາໄລມະຫິດົນ, ທ່ານ Professor Richard Cornall ຜູ້ອໍານວຍການ Nuffield Department of Medicine, ມະຫາວິທະຍາໄລອ໋ອກຝອດ ແລະ ທ່ານ ນ. Maggy Chan ຜູ້ບໍລິຫານສູງສຸດຂອງ Wellcome Trust.

ໃນນັ້ນ ທ່ານ Professor Paul Newton ອະດີດຜູ້ອຳນວຍການໂຄງການ LOMWRU ໄດ້ສະເໜີປະຫວັດຄວາມເປັນມາຂອງໂຄງການຄົ້ນຄວ້າ ແລະ ວຽກງານໃນໄລຍະ 20 ປີ ທີ່ຜ່ານມາທ່ານເພິ່ນໄດ້ປະຕິບັດໜ້າທີ່ຢູ່ ສປປ ລາວ, ຈາກນັ້ນ ທ່ານ Professor Elizabeth Ashley ຜູ້ອຳນວຍການໂຄງການ LOMWRU ສະເໜີບົດລາຍງານການຈັດຕັ້ງປະຕິບັດ ແລະ ແຜນໃນອະນາຄົດ ຂອງໂຄງການຄົ້ນຄວ້າ, ທ່ານ ນ. ມະນີວັນ ວົງສຸຫວັດ ຫົວໜ້າພະແນກຈຸລິນຊີວິທະຍາ, ໂຮງໝໍມະໂຫສົດ ລາຍງານການຮ່ວມມື ແລະ ຍົກລະດັບຄວາມຮູ້ຄວາມສາມາດທາງດ້ານວິຊາການ. ທ່ານ Professor Nicholas Day ຜູ້ອຳນວຍການໂຄງການ MORU ໄດ້ສະເໜີບົດການສ້າງເຄື່ອຂ່າຍການຄົ້ນຄ້ວາແບບຍືນຍົງໃນຂົງເຂດອາຊີຕາເວັນອອກສ່ຽງໃຕ້ ແລະ ທ່ານ ປອ.ດຣ. ມາຍຟອງ ມາຍຊາຍ ອະທິການບໍດີ ມະຫາວິທະຍາໄລວິທະຍາສາດສຸຂະພາບສະເໜີບົດຄົ້ນຄ້ວາວິທະຍາສາດ ແລະ ການຄົ້ນຄ້ວານະວັດຕະກຳໃນໄລຍະຜ່ານມາ ໃນ ສປປ ລາວ.

ໃນງານສະເຫລີມສະຫລອງຄັ້ງນີ້ ຍັງໄດ້ມີການວາງສະແດງ ຫ້ອງຈຸລີນຊີວິທະຍາແບບຈໍາລອງ, ຜົນງານທາງດ້ານວິທະຍາສາດຕ່າງໆໃນໄລຍະ 25 ປີຜ່ານມາ ເຊັ່ນ: ວາງໂພດເຕີຂອງການຄົ້ນຄ້ວາທີ່ພົ້ນເດັ່ນ ແລະ ຮູບພາບການເຮັດວຽກຂອງໂຄງການຄົ້ນຄວ້າໃນໄລຍະຜ່ານມາ.

Scroll to Top